Қашқадарё вилоятининг Нишон туманидаги «Отқудуқ» массивида 2015–2016 йилларда қад ростлаган 37 та намунали хонадон эгаларининг «Дарё»га мурожаат қилишича, замонавий талаблар асосида қуриб битказилган уй-жойларида яшаш учун шароит йўқ. На газ ва на сувдан дарак бор. Аҳоли туман ҳокимлиги ушбу муаммодан яхшигина хабардор бўлса-да, ҳудуд аҳолисига ўгайдек муносабатда бўлиб, муаммога панжа орасидан қараётганидан шикоят қилмоқда.
«Дарё» мухбири аҳоли мурожаатини ўрганиш мақсадида Нишон туманида бўлди.
— Намунали уй-жойлардан оламиз, — деб орзу қилиб, елиб-югуриб етишганимиз чўл ўртасида қад ростлаган на суви ва на газидан дарак бор бир маскан бўлди, — дейди ушбу ҳудудда яшовчи аҳоли вакилларидан бири Қудрат Мамарасулов. – Қарши туманининг «Мирмирон» ҳудудида қуриб битказилган намунали уй-жойларни кўриб, ҳавас қилгандик. Ўшандай уй-жойларга эришамиз деб ўйлагандик. Аммо ўйлаганларимиз сароб бўлиб чиқяпти. Шаҳар типида намунали дея қурилган уйларда на сув бор ва на газ.
— Сув ва газ йўқлиги ҳақида туман ҳокимлигига бир неча маротаба мурожаат қилдик, — дейди Нодира Камолова. – Аммо фойдаси йўқ. Ҳеч ким бизни эшитмаяпти. Ҳатто эшитишни ҳам хоҳламаяпти. Сўнгги кунларда туман ҳокимлигига бу хусусида билдириш учун борсак, киритишмаяпти ҳам. Сув йўқлигидан ҳар йили экаётган дарахтларимиз қуриб битмоқда. Биз ичимлик сувини сотиб олиб бўлса-да, ичишга тайёрмиз, ҳеч бўлмаганда артезиан сув чиқариб бериш имкониятини қилишсин, деган ўтинчимиз бор. Додимизни кимга айтишни билмай, бошимиз қотган.
Аҳоли вакилларидан бири Фахриддин Сатторовнинг қўшимча қилишича, ушбу ҳудуддан 100–150 метр нарида «Шўртангазкимё» мажмуаси учун 1000 лик ҳажмдаги трубада сув олиб ўтилган. Аҳоли ушбу сувдан умидвор эканлигини билдирмоқда.
— Яшаётган жойимизда болалар учун на ўйингоҳ бор ва на бирор бир спорт мажмуаси, — дейди Маҳбуба Раҳматова. – Фарзандларимиз «ўйнайман», деб кўчага чиқса, тупроққа булғаниб киради. Заводга юк олиб ўтаётган юк машиналарининг шовқини, ҳаракат пайти чанг кўтаришидан азият чекяпмиз. Энг ёмони юк машина ҳайдовчилари ўзаро пойга қўйишиб, уйимизни чанг-тўзонга тўлдиришади.
Аҳоли намунали уй-жойлар шаҳар нархида, балки ундан ҳам қиммат нархга пуллангани, аммо шундай бўлса-да, етарли даражадаги шароитлар билан таъминлаб берилмаганидан шикоят қилмоқда.
Собиқ «Отқудуқ», айни дамда «Янгиобод» дея ном берилган «Навбаҳор» маҳалласига қарашли ҳудудда яшовчи Дилором Боймуродованинг айтишича, ушбу ҳудуддан қурилган уй-жойлар учун вақтида вилоят марказидаги уй-жойлар нархидан ҳам 5 миллион сўм кўп пул олинган. Сабабига келганда, қурилиш материалларини олиб келиш харажатлари учун деган жавобни беришган.
— Ўша пайтда шаҳарда қурилган намунали уй-жойлардан ҳам 5 миллион сўм ортиқча тўлаганимизга ҳам розимиз, аммо яшаш учун шароит йўқлиги бизни ташвишлантираяпти, — дейди Дилором Боймуродова. – Нега энди уйга шаҳар нархида, керак бўлса ундан ортиқ пул тўлаб сув ва газсиз яшашимиз керак?
Маълум бўлишича, Нуристон шаҳарчасидан 5 километр нарида жойлашган «Отқудуқ» массивида 2015 йил 30 та, 2016 йил эса 7 та намунали турар-жойлар «Шўртангазкимё» мажмуаси ишчи ходимлари учун қуриб битказилган. Дастлабки бадал тўлови 50 миллион сўмдан 60 миллион сўмгача бўлган умумий нархи 175–185 миллион сўм қилиб баҳоланган мазкур турар-жой мажмуалари аллақачон фойдаланишга топширилган бўлса-да, айни кунга қадар ушбу уйларга газ ҳам, сув ҳам келтирилмаган.
— Энг ёмони 2016 йил биз учун қурилиши бошланган 7 та уй-жой якунига етмай, ўша пайтда ҳам анча муаммо бўлганди, — дейди Дилором Боймуродова. – Қурилиш ташкилоти уй қурилишини якунига етказмай анча сарсон қилган. Қурилиши 2016 йил бошланган уйимизга 2018 йил ноябрь ойида кўчиб ўтганмиз.
Туман ҳокимлиги бош мутахассиси Исматилла Менглиевнинг таъкидлашича, ушбу намунали уй-жойлар қурилиши олдидан аҳолига ушбу ҳудуд чекка ҳудуд ҳисобланиши, табиий газ бўлмаслиги, ичимлик суви ҳовуз орқали таъминланиши кўзда тутилгани тушунтирилган. Ва шунинг учун ҳам ҳар бир хонадонга 5 тонна сиғимга эга ҳовуз қурилган.
Исматилла Менглиевнинг маълумот беришича, 2015 йил қурилган 30 та уйнинг 15 таси «Уста тадбиркор» хусусий корхонаси томонидан қурилган бўлса, қолган 15 та уй ва яна 2016 йил қурилган 7 та уй-жойлар «Таллимаржон махсус иншоот қурилиш-таъмирлаш» МЧЖ вакиллари меҳнати билан қад ростлаган.
Аҳоли вакилларининг шикоятига кўра, қурилиш лойиҳасида 2015 йил қурилган 30 та турар-жой мажмуаси атрофидаги йўллар асфальтланиши кўзда тутилган бўлса-да, йўл қуриш шағал ётқизилиши билан тугатиб қўйилган. Иш якунига етмаган.
— Бу борада мурожаат қилмаган жойимиз қолмади, — дейди Шуҳрат Мамарасулов. – Аммо ҳалигача кўчаларимиз асфальтланмаган. Бундан-да ёмони шағал ётқизишда ишлар шу даражада чала ва сифатсиз бажарилганки, шағал аҳоли хонадонига кириш дарвозалари тагида уюлиб қолиб, кириш имкониятини чеклаб қўйган.
Журналистик суриштирувларимиз давомида аниқланишича, 2016 йил қуриб битказилган 7 та хонадоннинг баъзиларида ҳатто қурилиш ишлари ҳам якунига етмай, ташлаб кетилган. Буни Бувайша Арзиқулова яшаётган 32-хонадоннинг ювиниш хоналари ҳам исботлаб турибди.
— Ҳақиқатдан ҳам 2016 йил «Таллимаржон махсус иншоот қурилиш-таъмирлаш» МЧЖ томонидан қурилиши бошланган 7 та намунали турар-жой мажмуалари қурилиши ўз вақтида якунланмай, 2018 йилга келиб аҳолига топширилган эди, — дейди Исматилла Менглиев. – Анча муаммоли ҳолат юзага келганди. Бу эса аҳоли норозилигига сабаб бўлди. Шу боисдан ҳам аҳоли мурожаатига кўра, қурилиш ташкилоти устидан жиноий иш очилиб, тегишли хулосалар қилинган.
Ушбу ҳудудда яшовчи аҳоли вакиллари сув ва газ муаммосидан ташқари, ҳудудда болалар учун боғча, мактаб ва тиббий пункт ҳам кўзда тутилмаганидан изтиробда.
— Ҳудуд аҳолиси учун боғча, мактаб ва тиббиёт маркази қурилиши кўзда тутилган эди, — дейди Исматилла Менглиев. – Аммо 6 сотих майдонга эга бу каби турар-жой мажмуалари қурилиши якунланган, қолаверса ушбу ҳудуд сув ва газ учун ҳам ноқулай жой ҳисоблангани боис, боғча, мактаб каби ижтимоий соҳа объектлари қурилиши тўхтаб қолган. Аммо яқин келажакда боғча ҳам, мактаб ҳам бўлади, албатта. Сабаби ушбу ҳудуддан 400 нафар аҳолига 4 сотихдан аукцион орқали ер бериш кўзда тутилган бўлиб, кейинчалик гавжум масканга айланишига умид қиляпмиз.
Умид қилиш яхши, албатта. Аммо бу каби ишлар битгунга қадар ушбу ҳудудда яшаётган 37 та хонадон вакиллари нима қилади? Тупроққа беланиб, сувсиз, газсиз яшашда давом этадими? Демакки, ушбу ҳудуддаги уй-жойлар лойиҳаси тайёрланаётган пайт сув ва газ келиши амримаҳол эканлиги аниқ бўлган бўлса, унда хонадонга сув жўмраклари, ювиниш учун «ванна» ҳамда газ учун «отопление» ўрнатишдан мақсад нима? Саволлар кўп. Ўйлаймизки, Нишон туман ҳокимлиги бу каби саволларга тез орада жўяли жавоб қайтаради.
Изоҳ (0)