Toshkentda O‘zbekiston xalq shoiri Zulfiyaga bag‘ishlab o‘rnatilgan monument haroba holatga kelib qolgani to‘g‘risida tarqalgan xabar o‘z tasdig‘ini topmadi. Bu haqda O‘zbekiston Xotin-qizlar qo‘mitasi axborot xizmati rahbari Guljamol Asqarova ma’lum qildi, deya xabar bermoqda “Daryo” muxbiri Musulmonbek Ibrohimov.
“Ijtimoiy tarmoqlardagi hamma xabarni ham to‘g‘ri, deb bo‘lmaydi. Masalan, avvalroq tarmoqlarda: ‘Zulfiya mukofoti sohiblarining hammasi faol emas. Zulfiya haykalining atrofi rasvo bo‘lib yotibdi. Zulfiya: ‘Qizlarim qachon kelib, bu yerlarni tozalar ekan, deb ularning yo‘liga zor bo‘lib o‘tiribdi. Xotin-qizlar tashkiloti bu narsalarga e’tibor berishi kerak. Lekin bunday tashkilotning bor-yo‘qligi hali savol ostida’, degan gaplar tarqaldi. Haykal atrofini obodonlashtirish uchun Zulfiya mukofoti sohibi bo‘lgan qizlarimiz qo‘llariga supurgisini olib, tozalashga tayyor holda bordi. Buni hech qanday yomon joyi yo‘q. ‘Madrasani tuprog‘ini yalasang olim bo‘lasan’, degan gap bilan katta bo‘lganmiz. Zulfiyaxonimning haykalini tozalashdan or qiladigan joyimiz yo‘q, tozalayveramiz. Lekin joyga borib o‘rganganimizda, xabar yolg‘on bo‘lib chiqdi”, — dedi Guljamol Asqarova.
Qo‘mita raisi Elmira Bositxonovaning qo‘shimcha qilishicha, Zulfiya haykali o‘rnatilgan joyda ko‘ngilni xira qiladigan holat aniqlanmagan.
“Yevropadagi ko‘plab mis haykallar ko‘karib, siymosi o‘zgarib ketgan. Xabarni eshitganimdan so‘ng, balki shunday holatmikin deb o‘yladim. Zulfiyaning monumenti o‘rnatilgan joyni borib ko‘rganimizda, haykal hali oksidlanmagan, chiroyli, toza holatda turganiga guvoh bo‘ldik. Lekin bir kamchiligi bor — haykal oldidagi ko‘rgazmalar pavilyoni ta’mirlanayotgani uchun devor turibdi. Boshqa ko‘ngilni xira qiladigan hech narsa yo‘q. ‘Zulfiya’chi qizlarimiz bilan haykal o‘rnatilgan supa qanchalik toza bo‘lmasin, kunora ertalab suv bilan yuvib, yaltillab turishga kelishib oldik. Qizlar bu joyni tozalasa kam bo‘lmaydi”, — dedi Bositxonova.
Ma’lumot uchun, O‘zbekiston xalq shoiri Zulfiyaning haykali 2008-yil 1-martda O‘zbekiston davlat san’at muzeyi yonidagi xiyobonda o‘rnatilgan edi. Haykal 2017-yil Alisher Navoiy nomli O‘zbekiston Milliy bog‘idagi Adiblar xiyoboniga ko‘chirilgan.
Izoh (0)