O‘zbekiston bosh vaziri o‘rinbosari — ta’lim, sog‘liqni saqlash, ekologiya, atrof-muhitni muhofaza qilish, jismoniy tarbiya va sport masalalari kompleksi rahbari Aziz Abduhakimov oliy ta’lim muassasalariga hujjat topshirish vaqtida yuzaga kelayotgan navbatlarni barataraf etish uchun qanday choralar ko‘rilayotgani haqida ma’lumot berdi, deya xabar bermoqda “Daryo” Musulmonbek Ibrohimov.
Bosh vazir o‘rinbosarining qayd etishicha, qabul jarayonida ikkita muammo yuzaga kelgan va ular zudlik bilan bartaraf etilgan.
“Ochig‘ini aytganda, abituriyentlarning arizalarini OTMlarga qabul qilish jarayoniga puxta tayyorgarlik ko‘rildi, deb o‘ylagandik. Hujjatlarni qabul qilish jarayonini yuqori saviyada o‘tkazish uchun bir nechta komissiya tuzib, har bir oliy ta’lim muassasasining rektori bilan gaplashganmiz. Afsuski, ikkita muammoga duch keldik va ularni tezkorlik bilan hal qildik. Birinchi masala — banklarga to‘lov uchun bo‘lgan navbatlarni oldini olish uchun to‘lovlarni soat 07:00 dan qabul qilishni yo‘lga qo‘ydik”, — dedi Abduhakimov.
“Ikkinchi — serverlardagi muammolarni ham ko‘rib chiqdik. Reja bo‘yicha DTM serverlariga kuniga ko‘pi bilan 70—80 ming ariza bo‘yicha so‘rov kelishi taxmin qilingandi. Hozir kuniga 120—130 ming ariza tushmoqda. To‘xtalish va uzilishlarni hisobga olib, hujjatlarni ro‘yxatdan o‘tkazish sanasini bir-ikki kunga cho‘zishning muammosi yo‘q. Lekin uni 10—20 kunlab cho‘zish imkoniyati yo‘q, mantiqqa ham to‘g‘ri kelmaydi. Muammolarni bartaraf etish bo‘ycha barcha rektorlar bilan alohida gaplashib chiqdik”, — deya qo‘shimcha qildi u.
Ma’lumot uchun, dastlabki reja bo‘yicha abituriyentlardan arizalar qabuli 15-iyulga qadar davom etishi belgilangan. Barcha OTM va Davlat xizmatlari markazlarida 4,5 mingdan ortiq operator abituriyentlarni ro‘yxatdan o‘tkazish bilan shug‘ullanmoqda. Oliy va o‘rta maxsus ta’lim vazirligi ma’lumotlariga ko‘ra, 12-iyul holatiga ko‘ra 800 mingdan ortiq abituriyent o‘qishga kirish uchun ariza topshirgan.
Izoh (0)