Liviya fuqarosiga turmushga chiqqan o‘zbekistonlik ayol ikki farzandiga fuqarolik olib berishda yordam so‘rab O‘zbekiston Xotin-qizlar qo‘mitasiga murojaat qildi. Bu haqda qo‘mita raisi o‘rinbosari Gulnora Ma’rufova ma’lum qildi, deya xabar bermoqda “Daryo” muxbiri Musulmonbek Ibrohimov.
Ta’kidlanishicha, liviyalikka turmushga chiqqan ayol 2019-yil iyulida farzandlariga fuqarolik olishda amaliy yordam ko‘rsatishni so‘rab, O‘zbekiston Xotin-qizlar qo‘mitasiga kelgan.
“Liviya fuqarosiga turmushga chiqqan asli o‘zbekistonlik ayol ikki bolasiga O‘zbekiston fuqroligini olishda yordam va maslahat so‘rab, qo‘mitaga murojaat qildi. Ayolning aytishicha, Liviyada vaziyat yaxshi emas, u yerda har kuni otishma bo‘lmoqda. Farzandlari tinch yashashini xohlayotgani uchun ko‘mak berishimizni iltimos qildi”, — dedi Gulnora Ma’rufova.
Qo‘mita vakili o‘zbekistonlik ayol qanday qilib Liviya fuqarosi bilan oila qurgani va u Liviyadan O‘zbekitonga qanday qaytib kelganiga oydinlik kiritmadi. Qayd etish joiz, avvalroq Xitoy fuqarolariga turmushga chiqqan o‘zbekistonlik ayollar Vatanga qaytarilishi bilan bog‘liq bir necha holat yuz bergan edi.
Ma’lumot uchun, 2019-yil aprelidan beri Liviya poytaxti Tripolida qurolli to‘qnashuvlar davom etmoqda. Liviya milliy armiyasi qo‘mondoni Xalifa Xaftar BMT tomonidan Liviya hukumati sifatida tan olingan Milliy birdamlik hukumatini ag‘darib tashlash uchun Tripoliga bostirib kirishga qaror qilgan.
Izoh (0)