Тошкентда Ўзбекистон халқ шоири Зулфияга бағишлаб ўрнатилган монумент ҳароба ҳолатга келиб қолгани тўғрисида тарқалган хабар ўз тасдиғини топмади. Бу ҳақда Ўзбекистон Хотин-қизлар қўмитаси ахборот хизмати раҳбари Гулжамол Асқарова маълум қилди, дея хабар бермоқда «Дарё» мухбири Мусулмонбек Иброҳимов.
«Ижтимоий тармоқлардаги ҳамма хабарни ҳам тўғри, деб бўлмайди. Масалан, аввалроқ тармоқларда: ‘Зулфия мукофоти соҳибларининг ҳаммаси фаол эмас. Зулфия ҳайкалининг атрофи расво бўлиб ётибди. Зулфия: ‘Қизларим қачон келиб, бу ерларни тозалар экан, деб уларнинг йўлига зор бўлиб ўтирибди. Хотин-қизлар ташкилоти бу нарсаларга эътибор бериши керак. Лекин бундай ташкилотнинг бор-йўқлиги ҳали савол остида’, деган гаплар тарқалди. Ҳайкал атрофини ободонлаштириш учун Зулфия мукофоти соҳиби бўлган қизларимиз қўлларига супургисини олиб, тозалашга тайёр ҳолда борди. Буни ҳеч қандай ёмон жойи йўқ. ‘Мадрасани тупроғини яласанг олим бўласан’, деган гап билан катта бўлганмиз. Зулфияхонимнинг ҳайкалини тозалашдан ор қиладиган жойимиз йўқ, тозалайверамиз. Лекин жойга бориб ўрганганимизда, хабар ёлғон бўлиб чиқди», — деди Гулжамол Асқарова.
Қўмита раиси Элмира Боситхонованинг қўшимча қилишича, Зулфия ҳайкали ўрнатилган жойда кўнгилни хира қиладиган ҳолат аниқланмаган.
«Европадаги кўплаб мис ҳайкаллар кўкариб, сиймоси ўзгариб кетган. Хабарни эшитганимдан сўнг, балки шундай ҳолатмикин деб ўйладим. Зулфиянинг монументи ўрнатилган жойни бориб кўрганимизда, ҳайкал ҳали оксидланмаган, чиройли, тоза ҳолатда турганига гувоҳ бўлдик. Лекин бир камчилиги бор — ҳайкал олдидаги кўргазмалар павильони таъмирланаётгани учун девор турибди. Бошқа кўнгилни хира қиладиган ҳеч нарса йўқ. ‘Зулфияъчи қизларимиз билан ҳайкал ўрнатилган супа қанчалик тоза бўлмасин, кунора эрталаб сув билан ювиб, ялтиллаб туришга келишиб олдик. Қизлар бу жойни тозаласа кам бўлмайди», — деди Боситхонова.
Маълумот учун, Ўзбекистон халқ шоири Зулфиянинг ҳайкали 2008 йил 1 мартда Ўзбекистон давлат санъат музейи ёнидаги хиёбонда ўрнатилган эди. Ҳайкал 2017 йил Алишер Навоий номли Ўзбекистон Миллий боғидаги Адиблар хиёбонига кўчирилган.
Изоҳ (0)