O‘zbekistonning Zangiota Tomorqa Xizmati Export kompaniyasi (New Way Caravan Gardens brendi) Xitoyga 2020-yilda qiymati 1 mln dollarlik sarxil gilos yetkazib berish bo‘yicha shartnomalar imzoladi. Bu haqda XXRning O‘zbekistondagi elchixonasi matbuot xizmati ma’lumotiga tayanib “Xalq so‘zi” xabar qildi.
Shu yil 27—29-iyun kunlari Janubi-Sharqiy Osiyoning meva savdosi bo‘yicha eng yirik markazlaridan biri — Guanchjou shahrida bo‘lib o‘tgan Fruit Expo 2019-xalqaro ko‘rgazmasi doirasida bu borada kelishuvga erishilgan.
Guandun provinsiyasidagi yil bo‘yi Chilidan sarxil gilos sotib olish bilan shug‘ullanadigan kompaniyalar ilk bor O‘zbekiston bilan ham mazkur yo‘nalishda ish olib boradi. Binobarin, xitoylik sheriklar belgilangan muddatda O‘zbekistonga kelib mahsulotni qanday to‘g‘ri qadoqlash va jo‘natishni o‘rgatadi. 2020-yilda gilos narxiga qarab uning hajmi 200—250 tonnagacha yetishi mumkin, deya aniqlik kiritgan elchixona.
New Way Caravan Gardens gilosdan tashqari ko‘rgazmada Chin o‘lkasida talab katta bo‘lgan qovun, uzum, quruq mevalar va yong‘oqlarni ham namoyish etgan.
Ma’lumot uchun, Fruit Expo 2019-forumining umumiy maydoni 12 ming kv/metrga teng ko‘rgazma maydonida Chili, Peru, Ekvador, Buyuk Britaniya, Indoneziya, Tailand, Malayziya, Hindiston, Pokiston va Vyetnam kabi mamlakatlardan 200 ta eksponent taqdim qilindi.
Iyun oyidan boshlab O‘zbekiston Shanxayga ham gilos eksportini yo‘lga qo‘ydi. O‘shanda Xitoy kompaniyasi Tmall’da sotish uchun yurtimizda gilos importini 2600 tonnagacha yetkazishni rejalashtirayotgani haqida xabar bergandi.
May oyida esa o‘zbek gilosi Londondagi G‘arbiy xalqaro bozorgacha yetib bordi.
Izoh (0)