Ўзбекистоннинг Зангиота Томорқа Хизмати Эхпорт компанияси (New Wаy Caravan Gardens бренди) Хитойга 2020 йилда қиймати 1 млн долларлик сархил гилос етказиб бериш бўйича шартномалар имзолади. Бу ҳақда ХХРнинг Ўзбекистондаги элчихонаси матбуот хизмати маълумотига таяниб «Халқ сўзи» хабар қилди.
Шу йил 27—29 июнь кунлари Жануби-Шарқий Осиёнинг мева савдоси бўйича энг йирик марказларидан бири — Гуанчжоу шаҳрида бўлиб ўтган Фруит Эхпо 2019-халқаро кўргазмаси доирасида бу борада келишувга эришилган.
Гуандун провинциясидаги йил бўйи Чилидан сархил гилос сотиб олиш билан шуғулланадиган компаниялар илк бор Ўзбекистон билан ҳам мазкур йўналишда иш олиб боради. Бинобарин, хитойлик шериклар белгиланган муддатда Ўзбекистонга келиб маҳсулотни қандай тўғри қадоқлаш ва жўнатишни ўргатади. 2020 йилда гилос нархига қараб унинг ҳажми 200—250 тоннагача етиши мумкин, дея аниқлик киритган элчихона.
New Wаy Caravan Gardens гилосдан ташқари кўргазмада Чин ўлкасида талаб катта бўлган қовун, узум, қуруқ мевалар ва ёнғоқларни ҳам намойиш этган.
Маълумот учун, Fruit Expo 2019-форумининг умумий майдони 12 минг кв/метрга тенг кўргазма майдонида Чили, Перу, Эквадор, Буюк Британия, Индонезия, Таиланд, Малайзия, Ҳиндистон, Покистон ва Вьетнам каби мамлакатлардан 200 та экспонент тақдим қилинди.
Июнь ойидан бошлаб Ўзбекистон Шанхайга ҳам гилос экспортини йўлга қўйди. Ўшанда Хитой компанияси Tmall’да сотиш учун юртимизда гилос импортини 2600 тоннагача етказишни режалаштираётгани ҳақида хабар берганди.
Май ойида эса ўзбек гилоси Лондондаги Ғарбий халқаро бозоргача етиб борди.
Изоҳ (0)