Андижонда тиббиёт буюмларининг сотиб олиниши бўйича тарқалган маълумотларни республика ишчи органи текширмоқда. Бу ҳақда 5 июль куни журналистлар билан очиқ мулоқотда Молия вазирлиги Давлат харидлари бўйича бошқарма бошлиғи ўринбосари Сарвар Назаров маълум қилди.
Июнь ойи охирида Андижон вилояти ҳокими Шуҳрат Абдураҳмонов раислигида 9 июнь куни бўлиб ўтган йиғилишнинг ҳоким соғлиқни сақлаш тизими вакилларига қўпол ва ҳақоратли сўзлар билан муносабатда бўлаётгани ёзилган аудиоси интернетда тарқалган эди. Унда, жумладан, Соғлиқни сақлаш вазирлиги Андижон вилояти ҳокимлиги тендер ўтказмай, шприц ва тиббиёт қўлқопларни сотиб олгани ҳолати юзасидан бош прокурорга мурожаат қилгани ҳақида сўз боради (айнан шу ҳолат ҳақида сўз бораркан, ҳоким Абдураҳмонов Соғлиқни сақлаш вазири Алишер Шодмонов шаънига номаъқул фикрлар билдирган).
Кейинроқ ушбу ҳолат юзасидан Соғлиқни сақлаш вазирлиги баёнот бериб, «пул маблағларининг нотўғри тақсимланиши ва давлат харидларини амалга ошириш тартиби бузилиши оқибатида» Андижон вилояти аҳолисининг дори воситаларига бўлган эҳтиёжи 44,5 фоизга таъминланган бир пайтда, қўлқоп 265 фоизга, инфузион система 103 фоизга ҳамда шприц 500 фоизга эҳтиёждан ортиқ харид қилинганини маълум қилган. Вазирлик сотиб олинган тиббиёт буюмлари орасида сертификати бўлмаган сифатсиз маҳсулотлар борлигини қайд этиб ўтган эди. Шундан сўнг бунга Андижон вилояти ҳокимлиги ҳам муносабат билдирди.
Ҳукуматнинг молия-иқтисодиёт соҳаси масъулларининг 5 июль куни журналистлар билан бўлиб ўтган очиқ мулоқотида «Дарё» мухбири Мусулмонбек Иброҳимов Андижон вилоятида тиббиёт буюмларининг вилоят ҳокимлиги кўрсатмасига асосан, тендер ўтказмай сотиб олиш қонучиликка қай даражада тўғри келиши ҳақида савол берди. Саволга жавоб бераркан, Молия вазирлигининг Давлат харидлари бўйича бошқарма бошлиғи ўринбосари Сарвар Назаров тиббиёт буюмларини ҳокимлик эмас, балки бюджет буюртмачилари сотиб олганини таъкидлади.
«Тиббиёт буюмларини ҳокимлик эмас, давлат буюртмачилари, яъни ҳокимлик тасарруфида бўлган ташкилотлар ўз эҳтиёжларидан келиб чиқиб, давлат харидлари орқали сотиб олади. Бунинг учун ҳудудда харид комиссия ташкил этилган. Комиссия келиб тушган таклифларни ўрганиб чиқиб, кимдан сотиб олиш кераклиги бўйича қарор чиқаради. Қарорда биринчи навбатда нарх, иккинчи навбатда эса сифат кўрсатгичи қайд этилади», — деди Сарвар Назаров.
Молия вазирлиги вакилининг қўшимча қилишича, ушбу масала юзасидан тузилган ишчи орган ҳозирда текширув олиб бормоқда: «Андижонда тиббиёт буюмларини сотиб олиниши бўйича тарқалган маълумотларни республика ишчи органи текширмоқда. Ишчи орган таркиби Молия, Соғлиқни сақлаш вазирлиги ва прократура органлари вакилларидан иборат. Ишчи орган ўз ишини якунлагач, натижаси бўйича ОАВга қўшимча маълумот берилади», — деди у.
Изоҳ (0)