O‘zbekiston iste’molchilar huquqlarini himoya qilish jamiyatlari federatsiyasi hamda “O‘zyog‘moysanoat” uyushmasi qalbaki paxta yog‘idan ogohlantirdi, deb xabar bermoqda O‘zA.
Unda o‘simlik moyi xarid qilishda qanday jihatlarga e’tibor qaratish kerakligi bayon qilingan.
“Faqatgina sanoat usulida qadoqlangan va savdoga chiqarilgan o‘simlik moyini sotib oling. Uning yorlig‘ida davlatning, ishlab chiqaruvchi korxonaning nomi, tovar belgisi, haqiqiy og‘irligi yoki hajmi, navi, turi, qadoqlangan sanasi, standart belgisi ko‘rsatilishi shart”, — deyiladi xabarda.
Shuningdek, yog‘-moy mahsulotlari majburiy sertifikatlanishi, yorliqdagi barcha ma’lumotlar aniq va ravshan ko‘rinishi zarurligi eslatilgan.
“Xarid qilayotgan mahsulotingiz sifatiga ishonch hosil qilish uchun sotuvchidan uning muvofiqlik sertifikati hamda mahsulotga tegishli bo‘lgan boshqa ma’lumotlarni talab qilishga haqlisiz”, — deb ta’kidlangan ogohlantirishda.
Avvalroq O‘zbekiston iste’molchilar huquqlarini himoya qilish jamiyatlari federatsiyasi tomonidan Farg‘ona viloyatida plastik idishlarda qadoqlangan “Antiqa olam” paxta yog‘i tarkibida sovun qoldig‘i mavjudligi, kislota miqdori ham me’yordan ortiqligi aniqlangan.
Izoh (0)