Ўзбекистон истеъмолчилар ҳуқуқларини ҳимоя қилиш жамиятлари федерацияси ҳамда «Ўзёғмойсаноат» уюшмаси қалбаки пахта ёғидан огоҳлантирди, деб хабар бермоқда ЎзА.
Унда ўсимлик мойи харид қилишда қандай жиҳатларга эътибор қаратиш кераклиги баён қилинган.
«Фақатгина саноат усулида қадоқланган ва савдога чиқарилган ўсимлик мойини сотиб олинг. Унинг ёрлиғида давлатнинг, ишлаб чиқарувчи корхонанинг номи, товар белгиси, ҳақиқий оғирлиги ёки ҳажми, нави, тури, қадоқланган санаси, стандарт белгиси кўрсатилиши шарт», — дейилади хабарда.
Шунингдек, ёғ-мой маҳсулотлари мажбурий сертификатланиши, ёрлиқдаги барча маълумотлар аниқ ва равшан кўриниши зарурлиги эслатилган.
«Харид қилаётган маҳсулотингиз сифатига ишонч ҳосил қилиш учун сотувчидан унинг мувофиқлик сертификати ҳамда маҳсулотга тегишли бўлган бошқа маълумотларни талаб қилишга ҳақлисиз», — деб таъкидланган огоҳлантиришда.
Аввалроқ Ўзбекистон истеъмолчилар ҳуқуқларини ҳимоя қилиш жамиятлари федерацияси томонидан Фарғона вилоятида пластик идишларда қадоқланган «Антиқа олам» пахта ёғи таркибида совун қолдиғи мавжудлиги, кислота миқдори ҳам меъёрдан ортиқлиги аниқланган.
Изоҳ (0)