2019-yil 1-iyuldan boshlab yo‘l harakati qatnashchilari mobil videokamerasiz faoliyat olib borayotgan YPX xodimiga hujjatlarni taqdim etmaslik huquqiga ega ekanligi belgilangan edi.
Biroq, huquqshunos va bloger Xushnudbek Xudoyberdiyevning yozishicha, ushbu tartib 2020-yilgacha kechiktirilishi mummkin.
“Buni qarangki, regulation.gov.uz portalidagi bir loyiha nazarimizdan chetda qolgan ekan. 14 iyun kuni Ichki ishlar vazirligi tomonidan portalga Vazirlar Mahkamasining qarori loyihasi joylashtirilibdi. Loyiha VMning 2018 yil 1 dekabrdagi 975-son qaroriga bir qator o‘zgartirishlar kiritishni nazarda tutmoqda.
Unga ko‘ra, mobil videokameraga oid talablar 2019-yil 1-iyuldan emas, balki 2020-yil 1-yanvardan kuchga kirishini belgilashmoqchi.
Bu nima degani, bilasizmi? Bu Hukumat qarorlari qay darajada o‘yinchoq bo‘lib qolganini ko‘rsatadi. Kim nimani xohlasa, shuni qilyapti. Hozir xohlasa 2020-yil 1-yanvargacha uzaytirishadi, undan keyin xohlasa 2030-yil 1-yanvargacha uzaytirishadi, undan keyin xohlasa butunlay bekor qilib yuborishadi.
Hukumat qarorini o‘z muddatida bajarishni eplay olishmadimi, unda hadeb qarorlarni o‘yinchoq qilavermasdan, tinchgina aybni tan olib, uzr so‘rab, kelgan joyidan davom ettirsa bo‘lmaydimi?”, — deb yozadi huquqshunos.
“Videolarni ‘GAI’ni ruxsati bilan joylaysiz”
Huquqshunos muhokamaga qo‘yilgan qaror loyihasida ko‘zda tutilayotgan yana bir muhim tartib haqida ham eslatib o‘tdi:
“Bundan tashqari IIV o‘z loyihasida yanada ajoyib o‘zgarishlarni taklif etilmoqda.
Jumladan, haydovchilar o‘ziga tegishli audio, foto va video qurilmaga YPX xodimi bilan o‘zaro munosabati qayd qilingan ma’lumotlarni Internet jahon axborot tarmog‘iga ruxsatsiz joylashtirmasligi haqida talabni qo‘shishmoqda. Buning uchun o‘sha YPX xodimidan ruxsat olish kerak emish.
Bu nima uchun qilinyapti, YPX xodimlarining xatolari, qonunga xilof harakatlarini birovlar ko‘rmasligi uchunmi? YPX xodimi davlat idorasining vakili hisoblanadi va jamoatchilik nazorati nuqtai nazaridan uning harakatlari ommaviy e’lon qilinishi mumkin. Bu fuqarolarning axborot olish va tarqatishga oid konstitutsiyaviy huquqi bilan chambarchas bog‘liq.
Xo‘p, o‘sha videoni Internetga o‘zimas, o‘rtog‘i joylashtirdi, unda nima bo‘ladi? Xo‘p, o‘sha videoni o‘zi joylashtirdi, undachi, unda nima bo‘ladi? Jarima solinadimi? Qaysi modda bilan? Bu savollarning birortasiga javob yo‘q.
Xullas, Ichki ishlar vazirligining bir-biridan ajoyib takliflari aks etgan loyiha 29-iyungacha muhokama qilinadi. Siz ham muhokamada qatnashing va fikrlaringizni qoldiring” , — deb yozadi Xushnudbek Xudoyberdiyev.
Izoh (0)