Janubiy Koreyada 20-iyundan 25-iyunga qadar Koreya Ixtirochi ayollari assotsiatsiyasi (KWIA), Koreya Intellektual mulk offisi (KIPO) va Xalqaro intellektual mulk tashkiloti (WIPO) tomonidan XII Koreya Xalqaro Ixtirochi ayollar ko‘rgazmasi — KIWIE 2019 o‘tkazilmoqda. Bu haqda Xotin-qizlar qo‘mitasi matbuot xizmati ma’lum qildi.
KIWIE 2019 ko‘rgazmasida 30 dan ziyod davlatlardan 400 nafardan ortiq ixtirochi xotin-qiz texnika, texnologiya, tibbiyot, oziq-ovqat, yengil sanoat, kimyo va sanoatning turli yo‘nalishlari bo‘yicha o‘z ixtirolari hamda innovatsion ishlanmalari bilan qatnashmoqda.
O‘zbekiston Xotin-qizlar qo‘mitasi tomonidan 12 nafar iqtidorli xotin-qizlar ham 20—23-iyun kunlari o‘tkaziladigan xalqaro ko‘rgazma va forumda qatnashish hamda 24—25-iyun kunlari Ixtirochi ayollar akademiyasida o‘tkaziladigan o‘quv kurslarida o‘z malakalarini oshirishlari uchun yuborilgan edi.
Ular erishgan natijalari va ishlab chiqarayotgan mahsulotlarini namoyish qildi va xalqaro ekspertlar tomonidan o‘rganilib, yuqori baholandi.
O‘zbekiston Xotin-qizlar qo‘mitasi bo‘lim boshlig‘i, professor Karima Norqulovaning “Energiya tejamkor quritish qurilmasi” nomli ixtirosi KIWIE 2019’ning texnika-texnologiya yo‘nalishi bo‘yicha maxsus sovrin — Gran-pri sohibasi hamda Sky Beauty kompaniyasi rahbari Abdullayeva Nazokat tomonidan yaratilgan “Zaytun yog‘i asosida ishlab chiqilgan organik sovun” kosmetika yo‘nalishi bo‘yicha maxsus sovrin — Gran-pri sohibi bo‘ldi.
Shuningdek O‘zbekiston delegatsiyasi a’zolari 5 ta oltin, 2 ta kumush va 6 ta bronza medallarini ham qo‘lga kiritdi.
Izoh (0)