O‘zbekiston tomoni Saxalinda ayrim sohalar bo‘yicha mehnat migrantlariga qo‘yilgan taqiqni yumshatish uchun Rossiya tomoniga iltimos bilan chiqishi mumkin. Bu haqda O‘zbekiston bandlik va mehnat munosabatlari vaziri Sherzod Kudbiyev 18-iyun kuni jurnalistlar bilan bo‘lib o‘tgan muloqotda aytib o‘tdi.
Rossiyaning Saxalin viloyati gubernatori tomonidan 2018-yil 12-dekabrda imzolangan farmonga muvofiq, 2019-yilda shu viloyatda ta’lim, oziq-ovqat mahsulotlari ishlab chiqarish, chakana savdo, xususiy qo‘riqlash xizmatlari faoliyati, quruqlik va quvur transporti, transport vositalari uchun to‘xtash joylari, xavfli tovarlarni tashish, mehmonxona faoliyati va umumiy ovqatlanish korxonalari, suv chiqarish, tozalash va taqsimlash, oqova suvlarni to‘plash va qayta ishlash sohalariga patent asosida ishlovchi xorijiy fuqarolarni jalb qilishga taqiq qo‘yilgan. Keyinroq, 2019-yilning 17-iyunidan bu ro‘yxatga landshaft obodonlashtirish faoliyati, ishga qabul qilish, vaqtinchalik ish bilan ta’minlash agentliklari va reklama agentliklari faoliyati ham kiritilgan.
O‘zbekiston bandlik va mehnat munosabatlari vaziri Sherzod Kudbiyev Saxalinda ayrim sohalar bo‘yicha mehnat migrantlariga qo‘yilgan taqiqni yumshatishni so‘rab Rossiya mehnat vaziridan iltimos qilishi mumkinligini ma’lum qildi.
“Rossiya qonunchiligi bo‘yicha, gubernator o‘zi rahbarlik qilayotgan hududda cheklovlar kiritishga haqli. O‘z yo‘nalishim orqali Rossiya mehnat vazirligidan cheklovlarni O‘zbekiston fuqarolariga nisbatan kamaytirishni so‘rab, faqat iltimos qilishim mumkin. Mana shunday iltimoslarni diplomatik missiya orqali ham, Tashqi ishlar vazirligi orqali ham, to‘g‘ridan-to‘g‘ri ko‘rishganda ham aytyapmiz va qilyapmiz. Lekin ularning ichki ishiga aralashishga mening haqqim yo‘q”, — dedi Sherzod Kudbiyev.
Sherzod Kudbiyev Saxalinda qo‘yilgan taqiq tufayli ishsiz qolgan o‘zbekistonlik mehnat muhojirlarining boshqa kasblar bo‘yicha qayta o‘qitilishini ta’minlashga tayyorligini bildirdi: “Saxalinda ayrim yo‘nalishlar bo‘yicha ishlashga taqiq qo‘yilgan bo‘lsa va shu tufayli ishsiz qolgan o‘zbekistonlik mehnat muhojirlari O‘zbekistonga qaytib kelsa, boshqa yo‘nalishlar bo‘yicha qayta kasbga o‘qitishga va ishlash uchun imkoniyat yaratishga rozimiz. Albatta, bu ishlar Rossiya bilan qonuniy munosabatlar doirasida amalga oshiriladi”, — deya qo‘shimcha qildi u.
Izoh (0)