Ўзбекистон томони Сахалинда айрим соҳалар бўйича меҳнат мигрантларига қўйилган тақиқни юмшатиш учун Россия томонига илтимос билан чиқиши мумкин. Бу ҳақда Ўзбекистон бандлик ва меҳнат муносабатлари вазири Шерзод Кудбиев 18 июнь куни журналистлар билан бўлиб ўтган мулоқотда айтиб ўтди.
Россиянинг Сахалин вилояти губернатори томонидан 2018 йил 12 декабрда имзоланган фармонга мувофиқ, 2019 йилда шу вилоятда таълим, озиқ-овқат маҳсулотлари ишлаб чиқариш, чакана савдо, хусусий қўриқлаш хизматлари фаолияти, қуруқлик ва қувур транспорти, транспорт воситалари учун тўхташ жойлари, хавфли товарларни ташиш, меҳмонхона фаолияти ва умумий овқатланиш корхоналари, сув чиқариш, тозалаш ва тақсимлаш, оқова сувларни тўплаш ва қайта ишлаш соҳаларига патент асосида ишловчи хорижий фуқароларни жалб қилишга тақиқ қўйилган. Кейинроқ, 2019 йилнинг 17 июнидан бу рўйхатга ландшафт ободонлаштириш фаолияти, ишга қабул қилиш, вақтинчалик иш билан таъминлаш агентликлари ва реклама агентликлари фаолияти ҳам киритилган.
Ўзбекистон бандлик ва меҳнат муносабатлари вазири Шерзод Кудбиев Сахалинда айрим соҳалар бўйича меҳнат мигрантларига қўйилган тақиқни юмшатишни сўраб Россия меҳнат вазиридан илтимос қилиши мумкинлигини маълум қилди.
«Россия қонунчилиги бўйича, губернатор ўзи раҳбарлик қилаётган ҳудудда чекловлар киритишга ҳақли. Ўз йўналишим орқали Россия меҳнат вазирлигидан чекловларни Ўзбекистон фуқароларига нисбатан камайтиришни сўраб, фақат илтимос қилишим мумкин. Мана шундай илтимосларни дипломатик миссия орқали ҳам, Ташқи ишлар вазирлиги орқали ҳам, тўғридан-тўғри кўришганда ҳам айтяпмиз ва қиляпмиз. Лекин уларнинг ички ишига аралашишга менинг ҳаққим йўқ», — деди Шерзод Кудбиев.
Шерзод Кудбиев Сахалинда қўйилган тақиқ туфайли ишсиз қолган ўзбекистонлик меҳнат муҳожирларининг бошқа касблар бўйича қайта ўқитилишини таъминлашга тайёрлигини билдирди: «Сахалинда айрим йўналишлар бўйича ишлашга тақиқ қўйилган бўлса ва шу туфайли ишсиз қолган ўзбекистонлик меҳнат муҳожирлари Ўзбекистонга қайтиб келса, бошқа йўналишлар бўйича қайта касбга ўқитишга ва ишлаш учун имконият яратишга розимиз. Албатта, бу ишлар Россия билан қонуний муносабатлар доирасида амалга оширилади», — дея қўшимча қилди у.
Изоҳ (0)