Qirg‘izistonning O‘sh shahrida O‘zbekiston Oliy Majlisi va Qirg‘iziston Jogorku Kengeshi o‘rtasida hamkorlik bo‘yicha parlamentlararo komissiyaning ikkinchi majlisi bo‘lib o‘tdi. Bu haqda Oliy Majlis Senati matbuot xizmati ma’lum qildi.
Unda parlamentlararo komissiya a’zolari, O‘zbekiston va Qirg‘izistonning chegaradosh Andijon, Farg‘ona, Namangan viloyatlari hokimlari, O‘sh, Jalolobod, Botken oblastlari gubernatorlari (Qirg‘iziston hukumatining vakolatli vakillari), tashqi ishlar vazirliklari, har ikki davlatning elchilari ishtirok etgan.
Yig‘ilishda ikki qo‘shni davlat o‘rtasida savdo-iqtisodiy, investitsiya va madaniy-gumanitar yo‘nalishlaridagi hamkorlikni mustahkamlash va yanada yuqori bosqichga ko‘tarish, parlamentlararo komissiya imkoniyatlaridan samarali foydalanish yuzasidan fikr almashilgan.
“O‘zbekiston va Qirg‘iziston o‘rtasida savdo-sotiq hajmi joriy yilning o‘tgan davrida uch barobarga ortdi. Ayniqsa, turizm, madaniyat, ilm-fan va boshqa qator yo‘nalishlardagi hamkorlik ko‘lami tobora kengayib bormoqda. Bu, albatta, ikki xalqning do‘stligi, qo‘shnichilik munosabatlarini mustahkamlashga, turmush farovonligining yuksalishiga xizmat qilmoqda”, — degan Oliy Majlis Senati raisining o‘rinbosari Sodiq Safoyev.
Qirg‘iziston Jogorku Kengeshi agrar siyosat, suv resurslari, ekologiya va hududiy rivojlanish qo‘mitasi raisi o‘rinbosari Almazbek Akmatov esa ayni kunda Qirg‘iziston va O‘zbekiston o‘rtasida chegara hududlarini belgilash masalasi bo‘yicha 85 foiz kelishuvga erishilganini ma’lum qilgan. “Bu borada nafaqat parlamentlararo, balki, hukumatlararo komissiya ham ish olib bormoqda. Yaqin vaqt ichida aniqlik kiritilishi zarur bo‘lgan chegara hududlar bo‘yicha ham bir to‘xtamga kelinadi”, — deb ta’kidlagan.
Parlamentlararo komissiyaning ikkinchi majlisida belgilangan barcha masalalar muhokama qilinib, kelgusidagi muhim vazifalar, hamkorlikda amalga oshiriladigan ishlar belgilab olingan.
Izoh (0)