Қирғизистоннинг Ўш шаҳрида Ўзбекистон Олий Мажлиси ва Қирғизистон Жогорку Кенгеши ўртасида ҳамкорлик бўйича парламентлараро комиссиянинг иккинчи мажлиси бўлиб ўтди. Бу ҳақда Олий Мажлис Сенати матбуот хизмати маълум қилди.
Унда парламентлараро комиссия аъзолари, Ўзбекистон ва Қирғизистоннинг чегарадош Андижон, Фарғона, Наманган вилоятлари ҳокимлари, Ўш, Жалолобод, Боткен областлари губернаторлари (Қирғизистон ҳукуматининг ваколатли вакиллари), ташқи ишлар вазирликлари, ҳар икки давлатнинг элчилари иштирок этган.
Йиғилишда икки қўшни давлат ўртасида савдо-иқтисодий, инвестиция ва маданий-гуманитар йўналишларидаги ҳамкорликни мустаҳкамлаш ва янада юқори босқичга кўтариш, парламентлараро комиссия имкониятларидан самарали фойдаланиш юзасидан фикр алмашилган.
«Ўзбекистон ва Қирғизистон ўртасида савдо-сотиқ ҳажми жорий йилнинг ўтган даврида уч баробарга ортди. Айниқса, туризм, маданият, илм-фан ва бошқа қатор йўналишлардаги ҳамкорлик кўлами тобора кенгайиб бормоқда. Бу, албатта, икки халқнинг дўстлиги, қўшничилик муносабатларини мустаҳкамлашга, турмуш фаровонлигининг юксалишига хизмат қилмоқда», — деган Олий Мажлис Сенати раисининг ўринбосари Содиқ Сафоев.
Қирғизистон Жогорку Кенгеши аграр сиёсат, сув ресурслари, экология ва ҳудудий ривожланиш қўмитаси раиси ўринбосари Алмазбек Акматов эса айни кунда Қирғизистон ва Ўзбекистон ўртасида чегара ҳудудларини белгилаш масаласи бўйича 85 фоиз келишувга эришилганини маълум қилган. «Бу борада нафақат парламентлараро, балки, ҳукуматлараро комиссия ҳам иш олиб бормоқда. Яқин вақт ичида аниқлик киритилиши зарур бўлган чегара ҳудудлар бўйича ҳам бир тўхтамга келинади», — деб таъкидлаган.
Парламентлараро комиссиянинг иккинчи мажлисида белгиланган барча масалалар муҳокама қилиниб, келгусидаги муҳим вазифалар, ҳамкорликда амалга ошириладиган ишлар белгилаб олинган.
Изоҳ (0)