Rossiya tarkibidagi Mordoviya Respublikasi hududidan o‘tadigan M5 “Ural” trassasida 25-may kuni to‘rt nafar O‘zbekiston fuqarosi ketayotgan Chevrolet Spark (davlat raqami O‘zbekistonniki — 50 N 982 NA) avtomobili yo‘lning qarama-qarshi yo‘nalish qismiga o‘tib ketib, qarshisidan kelayotgan yuk mashinasiga urilgan.
Natijada haydovchi Nosirjon Toshmurodovich Dadaxonov (1961-yilda tug‘ilgan) va yo‘lovchi Dilshodbek Tursunbek o‘g‘li Jamoliddinov (1991-yilda tug‘ilgan) olingan jarohatdan voqea joyida vafot etgan. Abdug‘affor Abdujabborovich Qodirov (1969-yilda tug‘ilgan) va Abdiqodir Abdumalikovich Xoliqov (1969-yilda tug‘ilgan) Zubovo-Polyana tuman shifoxonasiga jarohat bilan yotqizilgan.
“Ularning holati, tibbiyot xodimlari bergan ma’lumotga ko‘ra, og‘ir barqaror”, — deyiladi O‘zbekistonning Qozon shahridagi bosh konsulxonasi axborotida. O‘zbekiston Tashqi ishlar vazirligidan ma’lum qilishlaricha, bosh konsulxona tomonidan mahalliy hokimiyat organlari bilan aloqa o‘rnatilgan va vaziyat nazoratga olingan.
Avvalroq Polshada yuz bergan YTH oqibatida Matiz’da ketayotgan bir o‘zbekistonlik halok bo‘lgani, yana biri og‘ir kuyish jarohatlari bilan kasalxonaga yotqizilgani haqida xabar berilgan edi.
Izoh (0)