Namanganda O‘zbekiston yoshlar ittifoqi va “Kamalak” bolalar tashkilotining maktablardagi cardorlar kengashlari o‘rtasida tashkil etilgan tanlovda 14 jamoa g‘oliblik uchun bahslashdi. Bu haqda “Daryo”ga Yoshlar ittifoqi Namangan viloyat kengashi matbuot xizmati ma’lum qildi.
Mamlakatdagi barcha o‘rta ta’lim muassasalaridagi sardorlar kengashi o‘z atrofiga 3,5 milliondan ziyod o‘quvchini birlashtirgan. Bu jamoatchilik tuzilmalarining asosiy faoliyati o‘quvchilar manfaatini himoya qilish, ularni umuminsoniy va milliy qadriyatlar asosida tarbiyalash, yoshlarda vatanparvarlik tuyg‘usini kuchaytirish, ijtimoiy daxldorlik, ekologik madaniyat, sog‘lom turmush tarzini shakllantirish, iste’dodli yoshlarni qo‘llab-quvvatlash va rivojlantirishdan iborat.
Ishtirokchilar sardorlar kengashi tomonidan amalga oshirilayotgan ishlarni badiiy chiqishlar orqali tanishtirdi. Shuningdek, jamoalar bugungi kunda bolalar o‘rtasida dolzarb bo‘lgan muammolar yechimi bo‘yicha yangi loyihalarini sahnada ko‘rgazmali vositalar orqali himoya qildi. Ayni paytda jamoa a’zolarining bilimlari ham sinovdan o‘tkazildi.
Qizg‘in bahs-munozaralarga boy bellashuvda Namangan viloyati va Toshkent shahri jamoalari birinchilikni qo‘lga kiritdi va g‘olib bo‘ldi. Jizzax viloyati jamoasi ikkinchi, Xorazm viloyati uchinchi o‘rinni egalladi.
G‘olib va faol ishtirokchilarga diplom hamda esdalik sovg‘alari topshirildi.
Izoh (0)