Samarqandda muddatli harbiy xizmatni o‘tashga kirishgan askarlar Registon maydonida qasamyod qabul qildi

Samarqand garnizonidagi harbiy qismlarda muddatli harbiy xizmatni o‘tashga kirishgan bir guruh oddiy askarlar Registon maydonida ona Vatanga sodiq xizmat qilishga tantanali ravishda harbiy qasamyod qabul qildi. Bu haqda “Zarnews.uz” xabar bermoqda.

Shu munosabat bilan o‘tkazilgan marosimda so‘zga chiqqan Samarqand viloyati hokimi E. Turdimov, Markaziy harbiy okrug qo‘shinlari qo‘mondoni, polkovnik A. Saidov va boshqalar milliy armiya har tomonlama bugungi talablariga mos shakllanganligi, harbiy xizmatchilar uchun yaratilgan sharoitlar, harbiylarning jangovar tayyorgarligi va salohiyati sarhadlar daxlsizligini ta’minlashga qodir ekanligini alohida ta’kidlab o‘tdi.

Harbiy qasamyod qabul qilib, Vatan himoyachisi degan ulug‘ nomga sazovor bo‘lgan aksarlar o‘zlariga bildirilayotgan yuksak ishonch va e’tibordan mamnun ekanliklarini bildirdi.

— Harbiy xizmat har bir yigit kishini burchi, — deydi oddiy askar Nizom Mamajonov. — Mana shunday burchni o‘tash uchun ajdodlarimizning bebaho merosi muazzam Registon maydonida harbiy qasamyod qabul qilganligimiz bizga yanada mas’uliyat, shijoat va g‘urur bag‘ishlaydi. Men va safdoshlarim o‘z ontimizga sodiq qolib, yurtimiz sarhadlarini har qanday yovdan munosib himoya qilib, ona Vatanimiz oldidagi yigitlik burchimizni mardonavor ado etamiz.

Registon maydonida harbiy qasamyod qabul qilgan askarlarga Prezident sovg‘asi — “Temur tuzuklari”, “O‘zbekiston tarixi” kitoblari topshirildi.