O‘zbekistondagi Finlyandiya Konsuli ko‘magida Toshkent davlat stomatologiya instituti rahbariyati tomonidan Finlyandiyaning yetakchi universitetlari tajribasi o‘rganildi. Muzokaralar natijasida 2019/2020-o‘quv yilidan boshlab, Finlyandiyaning JAMK universiteti bilan “Sog‘liqni saqlashda menejment” magistratura qo‘shma ta’lim dasturini tashkil qilish bo‘yicha kelishuvga erishildi. Bu haqda Sog‘liqni saqlash vazirligi jamoatchilik bilan aloqalar bo‘limi “Daryo”ga xabar berdi.
Jahon standartlari asosida menejment va tibbiy xizmatlar sifatini boshqarishning eng namunali amaliyotlarini joriy etishni ta’minlaydigan zamonaviy boshqaruv tizimini va hududlarda sog‘liqni saqlashni tashkil etishning “klaster” modelini shakllantirishda malakali mutaxassislarga O‘zbekistonda talab katta.
Shundan kelib chiqqan holda, joriy yil 11—12-aprel kunlari o‘tkazilgan o‘zbek-finlyandiya biznes-forum doirasida Toshkent davlat stomatologiya instituti va JAMK universiteti o‘rtasida hamkorlik to‘g‘risidagi Memorandum imzolandi. Endilikda ushbu hujjat asosida ikki yillik ta’limni muvaffaqiyatli tugatgan magistrlar har ikkala oliy o‘quv yurtining diplomini oladi.
Bu ham bo‘lsa, Toshkent davlat stomatologiya institutining sog‘liqni saqlash sohasida olib borilayotgan islohotlarda faol ishtirok etayotganidan dalolatdir.
Eslatib o‘tamiz, JAMK universiteti ko‘p tarmoqli oliy ta’lim muassasasi bo‘lib, unda sog‘liqni saqlash va ijtimoiy izlanishlar yo‘nalishida milliy va xalqaro ahamiyatga ega ilmiy-amaliy tadqiqotlar olib boriladi.
Izoh (0)