Qashqadaryo viloyat ko‘p tarmoqli tibbiyot markazi xodimlaridan iborat shifokorlar guruhi endilikda haftaning har chorshanba va shanba kunlari viloyatning eng chekka hududlarida bo‘lib, aholiga tibbiy xizmat ko‘rsatadi. Bu haqda “Daryo”ga viloyat ko‘p tarmoqli tibbiyot markazi ish boshqaruvchisi Galiya Sagitova ma’lum qilmoqda.
Galiya Sagitovaga ko‘ra, markazda yil davomida 18 000 nafardan ortiq bemor davolanadi. Ammo barcha bemorlar ham markazning o‘zida davolanish imkoniyatiga ega emasligi bois ham shifokorlar guruhi viloyatning uzoq va chegara zonalaridagi tumanlarda bo‘lib, aholining tibbiy xizmatga bo‘lgan ehtiyojini qondiradi. Buning uchun esa shifokorlar guruhiga 1 dona 14 kishilik Golden Dragon rusumli mikroavtobus va markazning budjetdan tashqari pullik tibbiy xizmati hisobidan Gentra avtomobili xarid qilindi.
— Ushbu avtomobillar xarid qilinganidan so‘ng markazning tor doiradagi malakali vrach xodimlari Mirishkor, Muborak, Koson va Yakkabog‘ tumanlarining eng olis QVP va QOPlarida bo‘lib, 500 nafar bemorni tibbiy ko‘rikdan o‘tkazdi, — deydi viloyat ko‘p tarmoqli tibbiyot markazi bosh shifokori To‘lqin Berdiyev. — Muhtaram yurtboshimiz Shavkat Mirziyoyevning so‘nggi yillarda sog‘liqni saqlash tizimiga katta e’tibor berayotganligi va aholining sog‘lig‘ini tiklash borasida bir qator qaror va farmonlar qabul qilinganligini e’tiborga olib, markazimizning bor imkoniyatidan foydalanishga qaror qildik.
Ma’lum bo‘lishicha, markaz mablag‘lari evaziga xarid qilingan Gentra Prezident virtual qabulxonasidan tushgan murojaatlarni joyiga borib o‘rganuvchi xodimlarga xizmat ko‘rsatadi. Aytilishicha, 2019-yil 1-aprel kuniga qadar markazga 98 ta murojaatlar kelib tushgan bo‘lib, markaz xodimlari murojaatchilar xonadonida bo‘lib muammoga yechim topgan.
— Ilgari murojaatni o‘rganish uchun yuborilayotgan xodim o‘z hisobidan xarj qilib uzoq va chekka hududlarga borib kelardi, — deydi To‘lqin Berdiyev. — Bu xodim uchun iqtisodiy jihatdan qiyinchilik tug‘dirardi. Ana shu muammoni yechish maqsadida avtomobil xarid qildik.
Ma’lumotlarga ko‘ra, viloyat ko‘p tarmoqli tibbiyot markazi 421 o‘rindan iborat bo‘lib, shundan 211 o‘rin budjet hisobidan, 210 o‘rin esa pullik tibbiy xizmatdan ishlab topilgan mablag‘ hisobidan moliyalashtiriladi.
Izoh (0)