Қашқадарё вилоят кўп тармоқли тиббиёт маркази шифокорлари эндиликда вилоятнинг чекка ҳудудларига бориб хизмат кўрсатади

Қашқадарё вилоят кўп тармоқли тиббиёт маркази ходимларидан иборат шифокорлар гуруҳи эндиликда ҳафтанинг ҳар чоршанба ва шанба кунлари вилоятнинг энг чекка ҳудудларида бўлиб, аҳолига тиббий хизмат кўрсатади. Бу ҳақда «Дарё»га вилоят кўп тармоқли тиббиёт маркази иш бошқарувчиси Галия Сагитова маълум қилмоқда.

Галия Сагитовага кўра, марказда йил давомида 18 000 нафардан ортиқ бемор даволанади. Аммо барча беморлар ҳам марказнинг ўзида даволаниш имкониятига эга эмаслиги боис ҳам шифокорлар гуруҳи вилоятнинг узоқ ва чегара зоналаридаги туманларда бўлиб, аҳолининг тиббий хизматга бўлган эҳтиёжини қондиради. Бунинг учун эса шифокорлар гуруҳига 1 дона 14 кишилик Golden Dragon русумли микроавтобус ва марказнинг бюджетдан ташқари пуллик тиббий хизмати ҳисобидан Gentra автомобили харид қилинди.

— Ушбу автомобиллар харид қилинганидан сўнг марказнинг тор доирадаги малакали врач ходимлари Миришкор, Муборак, Косон ва Яккабоғ туманларининг энг олис ҚВП ва ҚОПларида бўлиб, 500 нафар беморни тиббий кўрикдан ўтказди, — дейди вилоят кўп тармоқли тиббиёт маркази бош шифокори Тўлқин Бердиев. — Муҳтарам юртбошимиз Шавкат Мирзиёевнинг сўнгги йилларда соғлиқни сақлаш тизимига катта эътибор бераётганлиги ва аҳолининг соғлиғини тиклаш борасида бир қатор қарор ва фармонлар қабул қилинганлигини эътиборга олиб, марказимизнинг бор имкониятидан фойдаланишга қарор қилдик.

Маълум бўлишича, марказ маблағлари эвазига харид қилинган Gentra Президент виртуал қабулхонасидан тушган мурожаатларни жойига бориб ўрганувчи ходимларга хизмат кўрсатади. Айтилишича, 2019 йил 1 апрель кунига қадар марказга 98 та мурожаатлар келиб тушган бўлиб, марказ ходимлари мурожаатчилар хонадонида бўлиб муаммога ечим топган.

— Илгари мурожаатни ўрганиш учун юборилаётган ходим ўз ҳисобидан харж қилиб узоқ ва чекка ҳудудларга бориб келарди, — дейди Тўлқин Бердиев. — Бу ходим учун иқтисодий жиҳатдан қийинчилик туғдирарди. Ана шу муаммони ечиш мақсадида автомобиль харид қилдик.

Маълумотларга кўра, вилоят кўп тармоқли тиббиёт маркази 421 ўриндан иборат бўлиб, шундан 211 ўрин бюджет ҳисобидан, 210 ўрин эса пуллик тиббий хизматдан ишлаб топилган маблағ ҳисобидан молиялаштирилади.