Tashqi ishlar vaziri Abdulaziz Komilov Yevropa Ittifoqining Markaziy Osiyo bo‘yicha maxsus vakili Piter Burian va Afg‘oniston bo‘yicha maxsus vakili Roland Kobiani qabul qildi. Bu haqda TIV matbuot xizmati ma’lum qildi.
Uchrashuvda O‘zbekiston va Yevropa Ittifoqi o‘rtasidagi ko‘p qirrali aloqalarning holati va istiqbollari, jumladan Afg‘onistonning ijtimoiy-iqtisodiy tiklanishi va Orolbo‘yi muammosini hal etishga qaratilgan loyihalarni tadbiq etishdagi hamkorlik masalalari muhokama qilindi.
Yevropa Ittifoqi vakillari tomonidan siyosiy, savdo-iqtisodiy, sarmoyaviy, ilm-ta’lim, madaniy-gumanitar va boshqa sohalarda ikki tomonlama munosabatlarni yanada rivojlantirish uchun yangi imkoniyatlar ochayotgan O‘zbekistondagi keng ko‘lamli islohotlar jarayoni va ularning dastlabki natijalari yuqori baholandi.
Turli darajadagi aloqalarni faollashtirishdan tomonlar manfaatdorligi ta’kidlandi. Shu o‘rinda 2019-yilda bo‘lib o‘tadigan qo‘shma tadbirlar jadvali va kun tartibi yuzasidan fikr almashildi.
Suhbat chog‘ida xalqaro va mintaqaviy siyosatning dolzarb masalalari ko‘rib chiqildi.
Izoh (0)