Toshkent davlat agrar universiteti xalqaro aloqalarni rivojlantirish orqali ta’lim sifatini yanada yaxshilamoqda. O‘zAning yozishicha, Yevropa Ittifoqining Erasmus+ dasturi doirasidagi BuzNet va MAGNET loyihasi shulardan biridir.
Unga ko‘ra, Portugaliyaning Portu va Guardo universitetlari bilan hamkorlikni kengaytirish maqsadida Toshkent davlat agrar universiteti hamda uning Andijon va Nukus filiallari rahbarlari Portugaliyada bo‘ldi.
Tashrif davomida Toshkent davlat agrar universiteti va uning filiallaridagi professor-o‘qituvchilarni tuproqshunoslik, agrokimyo, qishloq xo‘jaligida axborot texnologiyalari, agrobiznes yo‘nalishlari bo‘yicha Guardo universitetida malakasini oshirishga kelishildi va shartnoma imzolandi.
Portu universiteti bilan o‘rnatilgan hamkorlik doirasida esa oltita veterinariya va sut mahsulotlarini qayta ishlash laboratoriyasi jihozlanadi.
Ana shu kelishuv doirasida aprelda 10 ga yaqin professor-o‘qituvchilar Portu universitetiga ikki oylik malaka oshirishga boradi. Ular qishloq xo‘jaligi mahsulotlarini qayta ishlash va oziq-ovqat xafvsizligi yo‘nalishida malaka oshiradi.
Izoh (0)