Pastdarg‘om tumanidagi “O‘zbekiston mustaqilligi 10 yilligi” muqobil mashina traktor parki (MMTP) hududida (Shombuloq qishlog‘i joylashgan) baliqchilikka ixtisoslashtirilgan fermer xo‘jaliklariga tuman hokimining topshirig‘iga ko‘ra suv berish to‘xtatilgan.
Mazkur hududdagi fermer xo‘jaligi rahbarlarining “Daryo”ga ma’lum qilishicha, baliqxonalarga suv berilmaganiga bir oy bo‘lgan.
Ayni paytda bu yerda “Zar-Kam-Rus baraka bog‘i”, “Shombuloq sazam baliqlari”, “Anhor-suv”, “Pastdarg‘om baliq xavzasi”, “Shombuloq amurlari” fermer xo‘jaliklari faoliyat yuritmoqda.
— 9 yildan buyon baliqchilik bilan shug‘ullanaman. Shu vaqtga qadar suv masalasida hech qanday muammo bo‘lmagan. Biroq so‘nggi bir oydan beri bizga suv bermayapti, — deydi “Shombuloq sazam baliqlari” fermer xo‘jaligi raisi Aleksandr Yakubov. — Bir-ikki kunda chovoq tashlamasak bu yil hech qanday baliq yetishtira olmaymiz. Har bir kun biz uchun g‘animat.
Baliqchilik bilan shug‘ullanuvchi fermer xo‘jaligi rahbarlarining ma’lum qilishicha, ular bir yilda 500 tonna baliq yetishtirib chiqararkan.
“Daryo” muxbiri mazkur holat yuzasidan jurnalistik surishtiruv olib bormoqda.
Izoh (0)