AQShning Nyu-York shahrida 27-mart kuni Rossiyada tug‘ilgan Germaniya fuqarosi Anna Sorokina ishi yuzasidan sud bo‘lib o‘tdi. Bu haqda Daily News xabar berdi.
28 yoshli Anna Sorokina 2016-yilda Nyu-Yorkka kelgan va o‘zini atrofidagilarga Anna Delvi deb tanishtirgan. Qiz o‘zini boy odamning merosxo‘ri deb atab, yuqori sinf vakillari bilan muloqotda bo‘lgan va o‘z nomiga zamonaviy san’at markazini ochishni rejalashtirgan. Sorokina mashhur brendlarning liboslarini kiygan va restoranlarda katta miqdorda choychaqa bergan. Shuning uchun atrofdagilar uning boy oiladan ekaniga ishongan.
Keyinroq ma’lum bo‘lishicha, qizning otasi dastlab yuk mashinasi haydovchisi bo‘lgan, keyin esa konditsioner o‘rnatuvchi kompaniya ochgan va qiziga kamroq pul yubora boshlagan. Sorokina yevropalik qarindoshlari uning qarzini to‘lashini va’da qilib, yolg‘on ishlatib 200 ming dollar kredit olgan. U mehmonxonalarda boy do‘stlarining puliga yoki bepul yashagan, qimmat restoran va bazmlarga borgan.
Prokuror Keygen Meys-Uilliamsning so‘zlariga ko‘ra, qiz turli tashkilotlardan jami 275 ming dollar qarzdor.
“Bizlarning ko‘pchiligimiz tirikchilik uchun pul topayotgan bir paytda, u qimmat restoranlarda bepul tushlik qilgan, hashamatli mehmonxonalarda yashagan. U bankdan, mehmonxonalardan, do‘stlarining pulini o‘g‘irlagan. Hatto investitsion jamg‘armaning ham pullarini o‘g‘irlashga uringan. Qisqacha qilib aytganda, u hammani aldagan”, — deydi prokuror.
Sorokinaning advokati Todd Spodekning aytishicha, qiz o‘zi ishlab pul topib, hamma qarzlarini to‘lashiga ishongan. Firibgar qizning atrofidagi barcha odam “ijtimoiy tarmoqlarda o‘z hayotini soxta hashamat bilan ko‘z-ko‘z qilgan”, bu esa qizning bu yo‘lga kirishiga turtki bo‘lgan.
Agar Sorokina katta miqyosdagi o‘g‘irlik va firibgarlikda aybdor deb topilsa, u 15 yilgacha bo‘lgan muddatga qamaladi. Aks holda, u sayyohlik vizasi allaqachon tugaganligi uchun Germaniyaga deportatsiya qilinadi.
Izoh (0)