Toshkentda o‘tkazilgan sayyor qabulda Bosh prokuror 125 nafar fuqaroning murojaati bilan tanishdi

Joriy yil 25-mart kuni Ichki ishlar vazirligi madaniyat saroyi binosida Bosh prokuror, Oliy sud raisi, Ichki ishlar vaziri, Adliya vaziri, Soliq qo‘mitasi raisi, Prezident maslahatchisi va uning birinchi o‘rinbosari hamda Toshkent shahar sektorlari rahbarlari tomonidan ommaviy (sayyor) qabullar tashkil etildi. Bu haqda Bosh prokuratura matbuot xizmati ma’lum qildi.

Qabullar davomida Bosh prokuror Otabek Murodov tomonidan 125 nafar fuqaro qabul qilinib, ularning murojaati tinglandi.

Bosh prokuratura tomonidan qabul qilingan murojaatlarning 74 tasi sud masalalari, 15 tasi prokuratura ish yurituvi, 10 tasi ichki ishlar, 10 tasi majburiy ijro, 3 tasi bank, 2 tasi ish bilan ta’minlash, 2 tasi qurilish va 9 tasi boshqa masalalarga oid murojaatlarni tashkil etdi.

Qabulda kelib tushgan murojaatlar yuzasidan prokuratura idoralari tomonidan jinoyat ishlari bo‘yicha 4 ta sud qaroriga nisbatan protest keltirildi, 2 nafar shaxsga nisbatan qo‘llanilgan ehtiyot choralari o‘zgartirildi, 1 nafar uy-joyi buzilgan fuqaroga kompensatsiya to‘lab berilishi, shuningdek 5 nafar shaxs ishga joylashtirilishi ta’minlandi.

Ommaviy qabul jarayonida 21 nafar shaxsning murojaati qanoatlantirilib, qolgan 104 tasi shaxsan Bosh prokuror nazoratiga olindi.

Jumladan, fuqaro S.Babayevaning Toshkent viloyati, Toshkent tumani prokuraturasi tomonidan tergov harakatlari olib borilayotgan jinoyat ishi bo‘yicha turmush o‘rtog‘i Sh.Davlatovga qo‘llanilgan qamoqqa olish tarzidagi ehtiyot chorasini bekor qilib, ozodlikka chiqarishni so‘rab qilgan murojaati qabul jarayonida sud idoralari bilan hamkorlikda ko‘rib chiqilib, Sh.Davlatovga nisbatan qo‘llanilgan mazkur ehtiyot chorasi bekor qilinishi ta’minlandi.

Shuningdek, fuqaro T.Safarovaning jiyani Sh.Abdullayevni “O‘zbekiston temir yo‘llari” AJ tizimiga ishga kiritish haqidagi murojaati qanoatlantirildi.

Qabul qilingan murojaatlarni o‘z vaqtida va to‘laqonli hal etilishini ta’minlash maqsadida 42 ta jinoyat, 20 ta fuqarolik, 8 ta ma’muriy va 4 ta iqtisodiy ish Bosh prokuraturaga chaqirtirilib, hozirda murojaatlar asosida o‘rganilmoqda.