O‘zbekiston ta’lim, fan va madaniyat xodimlari kasaba uyushmasi Respublika kengashiga 2019-yil 19-mart kuni Bo‘z tumani xalq ta’limi muassasalari xodimlariga mart oyi uchun avans (bo‘nak) pullari berilmayotganligi to‘g‘risida xabar kelib tushdi, deb xabar berdi O‘zbekiston ta’lim, fan va madaniyat xodimlari kasaba uyushmasi matbuot xizmati.
Xabarga ko‘ra, Andijon viloyati Bo‘z tumanlararo sudining 2018-yil 18-dekabrdagi 2-1703-1801G‘5840-2018-sonli ijro varaqasiga ko‘ra, qarzdor Bo‘z tuman xalq ta’limi bo‘limi hisobidan undiruvchi E.Soliyev foydasiga 7 652 163 so‘m ish haqi, 500 000 so‘m ma’naviy zarar undirilishi o‘z vaqtida amalga oshirilmagan. Shu tufayli Bo‘z tuman Xalq ta’limi bo‘limi hisob raqamiga cheklov ko‘yilgan va tumandagi barcha xalq ta’limi pedagoglari va xodimlariga 2019-yil mart oyi uchun avans (bo‘nak) pullarini o‘tkazib berishning imkoni bo‘lmagan.
Mazkur masalada pedagoglarning ta’lim, fan va madaniyat xodimlari kasaba uyushmasi tuman kengashi va tuman xalq ta’limi bo‘limi tuman G‘aznachilik bo‘limi hamda boshqa mutasaddi tashkilotlarga qilgan murojaatlari va sa’y – harakatlari natija bermagandan so‘ng 2019-yil 19-mart soat 12:46 da O‘zbekiston ta’lim, fan va madaniyat xodimlari kasaba uyushmasi Respublika kengashining mas’ul xodimlariga murojaat qilgan.
Ushbu murojaat yuzasidan Respublika kengashi O‘zbekiston Respublikasi Adliya vazirligining Inson huquqlarini himoya qilish boshqarmasi bilan hamkorlikda ta’sirchan choralar ko‘rdi va shu kuni ikki soat ichida tuman Xalq ta’limi bo‘limi hisob raqamiga qo‘yilgan cheklov olib tashlandi. 1800 nafar pedagog va xodimlarning 2019-yil mart oyi uchun avans (bo‘nak) pullari 19-mart kuni tushlikdan keyin plastik kartalariga tushirib berildi.
Izoh (0)