21- mart kuni Navro‘z ayyomi munosabati bilan AQSh Qurolli kuchlari Markaziy qo‘mondonligida (Tampa shahri, Florida shtati) rasmiy vakil sifatida faoliyat yuritayotgan O‘zbekiston Mudofaa vazirligi harbiy xizmatchilari tomonidan xorijiy hamkasblariga bayram tadbiri tashkil etildi, deb xabar berdi vazirlik matbuot xizmati.
Ushbu tadbirda AQSh Qurolli kuchlari CENTCOM rahbariyati hamda u yerda hamkorlik faoliyatini yuritayotgan 50 dan ortik davlat vakili qatnashdi. O‘zbekistonlik harbiylar va ularning oila a’zolari tomonidan bahoriy taomlardan iborat o‘zbekona bayram dasturxoni yozilib tadbir ishtirokchilari e’tiboriga havola etildi. Ko‘k somasa-yu chuchvaralar hamda oshni tatib ko‘rgan mehmonlar o‘zbekona mehmondarchilig-u, milliy taomlarga yuqori baholar berdi, deyiladi xabarda.
Shuningdek, tadbir davomida “Yangi O‘zbekiston” nomli targ‘ibot prezentatsiyani ham namoyish etildi.
Prezentatsiyada o‘zbek xalqining buyuk merosi, tarixi, madaniyati, urf-odatlari, tarixiy obidalari, iqtisodiyoti va siyosati, milliy armiyasi, O‘zbekiston hududida yashab ijod etgan buyuk siymolari va ularning dunyo sivilizatsiasining rivojiga qo‘shgan hissasi, bugungi kundagi yangi O‘zbekistonninig barcha sohalarda erishayotgan ulkan yutuqlari va boshqa jihatlari namoyish etildi.
“O‘zbekiston bo‘ylab sayohat” mavzusida namoyish etilgan qisqa metrajli hujjatli film barchada katta taassurot qoldirdi.
O‘zbekiston harbiy xizmatchilarining ushbu tadbirga tayyorgarligi va ishtirokiga AQSh Qurolli kuchlari Markaziy qo‘mondonligi tomonidan yuqori baho berildi va tashakkur izhor etildi.
Izoh (0)