O‘tgan yil avgust oyida “Portu” o‘z safini Eder Militao ismli yosh futbolchi bilan to‘ldirishga erishdi. Bir yil o‘tar-o‘tmas Eder ismli o‘sha yigit kimsan Madridning “Real”iga kuzatib qo‘yilmoqda. Arzonga emas, albatta. Uning transferi Zidan jamoasiga oz emas, ko‘p emas naq 50 million yevroga tushgani aytilmoqda.
“Qirollik klubi” rahbariyati ayni damda nafaqat klubni kuchaytirish, balki jamoa faxriylariga o‘rinbosar izlab, ularni klubga jalb qilish uchun harakat qilayotganiga yaqqol misollardan biri Eder hisoblanadi. Qachondir o‘zining “Galaktikos”i bilan muxlislarni hayratda qoldirgan “Real” endilikda yosh iqtidorlar bilan bu ishni qilishga urinayotgani ham quvonarli hol. Jamoa asosiy tarkibidagi 18 yoshli Vinisius Juniorning harakatlari-yu, 22 yashar Serxio Regilonning tezkorligi muxlislar uchun kutilmagan, ammo xursand qila oladigan tuhfalardan biri bo‘lgani ham haqiqat.
Ammo mavsum tugamasdan turib, Zidanning qaytishi bilan katta transferga aylangan Eder Militao, shubhasiz Madrid muxlislarini yana bir karra o‘ziga qaratdi.
Eder atigi 21 yoshda. U “Portu”da 2018-yil avgust oyida paydo bo‘lgandi. Janubiy amerikalik futbolchi uchun Yevropa futboliga ko‘nikishga ma’lum vaqt talab etilishi bor gap. Biroq Eder “Portu”da avvaldan to‘p surgandek, nafaqat jamoa o‘yinlariga qo‘shilib ketdi, balki himoya qo‘rg‘oniga aylana oldi. “Portu” bosh murabbiyi Serjiu Konseysauning bu transferdan xursand bo‘lmasligining aslo ilojisi yo‘q edi: braziliyalik himoyaning istalgan o‘rni — o‘ng, chap, markazda ham qoyilmaqom o‘yin ko‘rsatishi natijasida “Portu” Yevropa Chempionlar Ligasi chorak finaliga yetib keldi. Militao musobaqa davomida atigi bitta o‘yinni o‘tkazib yubordi. U Chempionlar Ligasi musobaqasi guruh bosqichida jamoadoshi Felipe bilan himoyaning markazida ajoyib tandem hosil qila oldi. Va hattoki “Shalke-04”ga qarshi bahsda hal qiluvchi golni urishga erishdi.
“Roma” bilan bahsda esa u o‘zining universalligini namoyish etib, o‘ng qanotda ajoyib “tomosha”lar ko‘rsatdi. Natija o‘zingizga ma’lum: o‘tgan yili “Barselona”ni musobaqadan chiqarib, shov-shuv ko‘targan “Roma” Militao yetakchiligidagi “Portu” to‘sig‘idan o‘ta olmay, Yevrokuboklardagi ishtirokini erta yakunladi. Militao asosan himoya markazida o‘ynasa ham uning qanotlar orqali hujumga qo‘shilishi muxlislarni xursand qilmoqda. Uning himoyada ishonchli harakatlari esa “pentakampeonlar”da kelajakka katta umid bilan qarashlariga sabab bo‘layotir. Uning hatto o‘z jarima maydoniga yaqin hududlarda dribling namoyish etishi esa tort ustiga olcha misoli bezakni taqdim qilmoqda.
Ammo uning tez o‘sayotganini inkor qilib bo‘lmaydi. Futbolchi 2018-yilgi o‘yinlarda to‘p uchun kurashda ko‘proq tavakkalga qo‘l urgandi. Natijada 13 ta o‘yinda 6 ta sariq kartochka olgandi. Ne ajabki, u “Portu”da shu vaqtga qadar birorta sariq kartochka olgani yo‘q. Bu esa 21 yoshli yigitning sovuqqonlik bilan xatosiz o‘ynashga intilayotganidan dalolat bermoqda. Mana shularning o‘ziyoq “Real” nima uchun bu yigit uchun kattagina mablag‘ni to‘lashga rozi bo‘lganligi sababini ko‘rsatadi. “Portu”ning “Nasional” (ha, o‘sha siz bilgan o‘zbekistonlik yarim himoyachi Sardor Rashidov to‘p suradigan klub, u bu o‘yinda ishtirok etmagan. Hali jamoaga kelib qo‘shilmagandi) ustidan qozongan (3:1) g‘alabasi vaqtida stadionda “Manchester Yunayted” skautlari bo‘lgani xabar qilindi. Shu vaqtda Ederga Virjil van Deykka ishonchli sherik axtarayotgan “Liverpul”ning ham qiziqayotganligi haqida bonglar urildi. Ammo “Real” ulardan olg‘ir va epchilroq chiqdi. Eder 2019-yil yozida “Real” safiga qo‘shiladigan bo‘ldi.
Ayni chog‘da Madrid klubi himoyada ko‘plab muammolarga uchramoqda. Serxio Ramos allaqachon 32 yoshni urib qo‘ydi, Nacho esa hamon yuqori darajadagi o‘yinlarga tayyor emasligi ko‘rinib qolmoqda. Bu ayniqsa, “Bernabeu”da “Ayaks”ga qarshi (1:4) o‘yinda o‘zini ko‘rsatdi.
Xo‘sh, Eder darhol “Qirollik klubi” asosiy tarkibiga kira oladimi. Buni hozircha hech kim bilmaydi. Ammo uning “ajdarholar” safidagi o‘yini, unda buning uchun barcha imkoniyatlar borligini ko‘rsatmoqda.
Goal’dan Asror Abdunazarov tarjimasi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)