Ўтган йил август ойида «Порту» ўз сафини Эдер Милитао исмли ёш футболчи билан тўлдиришга эришди. Бир йил ўтар-ўтмас Эдер исмли ўша йигит кимсан Мадриднинг «Реал»ига кузатиб қўйилмоқда. Арзонга эмас, албатта. Унинг трансфери Зидан жамоасига оз эмас, кўп эмас нақ 50 миллион еврога тушгани айтилмоқда.
«Қироллик клуби» раҳбарияти айни дамда нафақат клубни кучайтириш, балки жамоа фахрийларига ўринбосар излаб, уларни клубга жалб қилиш учун ҳаракат қилаётганига яққол мисоллардан бири Эдер ҳисобланади. Қачондир ўзининг «Галактикос»и билан мухлисларни ҳайратда қолдирган «Реал» эндиликда ёш иқтидорлар билан бу ишни қилишга уринаётгани ҳам қувонарли ҳол. Жамоа асосий таркибидаги 18 ёшли Винисиус Жуниорнинг ҳаракатлари-ю, 22 яшар Серхио Регилоннинг тезкорлиги мухлислар учун кутилмаган, аммо хурсанд қила оладиган туҳфалардан бири бўлгани ҳам ҳақиқат.
Аммо мавсум тугамасдан туриб, Зиданнинг қайтиши билан катта трансферга айланган Эдер Милитао, шубҳасиз Мадрид мухлисларини яна бир карра ўзига қаратди.
Эдер атиги 21 ёшда. У «Порту»да 2018 йил август ойида пайдо бўлганди. Жанубий америкалик футболчи учун Европа футболига кўникишга маълум вақт талаб этилиши бор гап. Бироқ Эдер «Порту»да аввалдан тўп сургандек, нафақат жамоа ўйинларига қўшилиб кетди, балки ҳимоя қўрғонига айлана олди. «Порту» бош мураббийи Сержиу Консейсаунинг бу трансфердан хурсанд бўлмаслигининг асло иложиси йўқ эди: бразилиялик ҳимоянинг исталган ўрни — ўнг, чап, марказда ҳам қойилмақом ўйин кўрсатиши натижасида «Порту» Европа Чемпионлар Лигаси чорак финалига етиб келди. Милитао мусобақа давомида атиги битта ўйинни ўтказиб юборди. У Чемпионлар Лигаси мусобақаси гуруҳ босқичида жамоадоши Фелипе билан ҳимоянинг марказида ажойиб тандем ҳосил қила олди. Ва ҳаттоки «Шальке-04»га қарши баҳсда ҳал қилувчи голни уришга эришди.
«Рома» билан баҳсда эса у ўзининг универсаллигини намойиш этиб, ўнг қанотда ажойиб «томоша»лар кўрсатди. Натижа ўзингизга маълум: ўтган йили «Барселона»ни мусобақадан чиқариб, шов-шув кўтарган «Рома» Милитао етакчилигидаги «Порту» тўсиғидан ўта олмай, Еврокубоклардаги иштирокини эрта якунлади. Милитао асосан ҳимоя марказида ўйнаса ҳам унинг қанотлар орқали ҳужумга қўшилиши мухлисларни хурсанд қилмоқда. Унинг ҳимояда ишончли ҳаракатлари эса «пентакампеонлар»да келажакка катта умид билан қарашларига сабаб бўлаётир. Унинг ҳатто ўз жарима майдонига яқин ҳудудларда дриблинг намойиш этиши эса торт устига олча мисоли безакни тақдим қилмоқда.
Аммо унинг тез ўсаётганини инкор қилиб бўлмайди. Футболчи 2018 йилги ўйинларда тўп учун курашда кўпроқ таваккалга қўл урганди. Натижада 13 та ўйинда 6 та сариқ карточка олганди. Не ажабки, у «Порту»да шу вақтга қадар бирорта сариқ карточка олгани йўқ. Бу эса 21 ёшли йигитнинг совуққонлик билан хатосиз ўйнашга интилаётганидан далолат бермоқда. Мана шуларнинг ўзиёқ «Реал» нима учун бу йигит учун каттагина маблағни тўлашга рози бўлганлиги сабабини кўрсатади. «Порту»нинг «Насионал» (ҳа, ўша сиз билган ўзбекистонлик ярим ҳимоячи Сардор Рашидов тўп сурадиган клуб, у бу ўйинда иштирок этмаган. Ҳали жамоага келиб қўшилмаганди) устидан қозонган (3:1) ғалабаси вақтида стадионда «Манчестер Юнайтед» скаутлари бўлгани хабар қилинди. Шу вақтда Эдерга Виржил ван Дейкка ишончли шерик ахтараётган «Ливерпуль»нинг ҳам қизиқаётганлиги ҳақида бонглар урилди. Аммо «Реал» улардан олғир ва эпчилроқ чиқди. Эдер 2019 йил ёзида «Реал» сафига қўшиладиган бўлди.
Айни чоғда Мадрид клуби ҳимояда кўплаб муаммоларга учрамоқда. Серхио Рамос аллақачон 32 ёшни уриб қўйди, Начо эса ҳамон юқори даражадаги ўйинларга тайёр эмаслиги кўриниб қолмоқда. Бу айниқса, «Бернабеу»да «Аякс»га қарши (1:4) ўйинда ўзини кўрсатди.
Хўш, Эдер дарҳол «Қироллик клуби» асосий таркибига кира оладими. Буни ҳозирча ҳеч ким билмайди. Аммо унинг «аждарҳолар» сафидаги ўйини, унда бунинг учун барча имкониятлар борлигини кўрсатмоқда.
Goal’дан Асрор Абдуназаров таржимаси.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)