Prezident sovrini uchun Markaziy Osiyo davlatlari, qo‘shni Afg‘oniston chavandozlari ham ot choptirgan Qashqadaryo viloyatidagi ko‘pkarida shahrisabzlik Sirojiddin Jovliyev “Fonar” laqabli oti bilan g‘oliblikni qo‘lga kiritib, Gentra avtomobiliga ega bo‘ldi. Bu haqda “Daryo”ga Qashqadaryo viloyat hokimligi matbuot xizmati rahbari Bekzod Mamatqulov ma’lum qilmoqda.
Shavkat Mirziyoyevning 2018-yil dekabr oyida Qashqadaryo viloyatiga tashrifi chog‘ida Qorabayir zotli otlarining dovrug‘ini keng yoyish maqsadida Navro‘z bayrami arafasida Xalqaro ko‘pkari o‘yinlarini o‘tkazish bo‘yicha topshiriq berilgan edi.
Bekzod Mamatqulovga ko‘ra, 2019-yil 18-mart kuni Qashqadaryo viloyati Kitob tumanining “Qaynar” qishlog‘ida bo‘lib o‘tgan Xalqaro ko‘pkari va milliy xalq o‘yinlari musobaqasi mazkur topshiriqqa binoan o‘tkazilgan.
— Musobaqa doirasida milliy kurash, arqon tortish, tosh ko‘tarish, qo‘chqor, xo‘roz urishtirish kabi milliy xalq o‘yinlari ham o‘tkazildi, — deydi Bekzod Mamatqulov. – Uloq chopishda shahrisabzlik chavandoz tengsiz deb topilgan bo‘lsa, kurash musobaqasida g‘uzorlik Sherali Jo‘rayev mutlaq vazn toifasida g‘olib chiqib, bosh sovrin — Spark avtomobilini qo‘lga kiritdi. Shuningdek, kurash bo‘yicha ayollar o‘rtasida ham g‘olib va sovrindorlar aniqlandi.
Ma’lum bo‘lishicha, musobaqada gilamga chiqib g‘oliblikni qo‘lga kiritgan polvonlar ham, uloq ayirgan chavandozlar ham tuya, toy, qoramol, qimmatbaho maishiy texnika buyumlari va pul mukofotlari bilan rag‘batlantirilgan.
Izoh (0)