Президент соврини учун Марказий Осиё давлатлари, қўшни Афғонистон чавандозлари ҳам от чоптирган Қашқадарё вилоятидаги кўпкарида шаҳрисабзлик Сирожиддин Жовлиев «Фонар» лақабли оти билан ғолибликни қўлга киритиб, Gentra автомобилига эга бўлди. Бу ҳақда «Дарё»га Қашқадарё вилоят ҳокимлиги матбуот хизмати раҳбари Бекзод Маматқулов маълум қилмоқда.
Шавкат Мирзиёевнинг 2018 йил декабрь ойида Қашқадарё вилоятига ташрифи чоғида Қорабайир зотли отларининг довруғини кенг ёйиш мақсадида Наврўз байрами арафасида Халқаро кўпкари ўйинларини ўтказиш бўйича топшириқ берилган эди.
Бекзод Маматқуловга кўра, 2019 йил 18 март куни Қашқадарё вилояти Китоб туманининг «Қайнар» қишлоғида бўлиб ўтган Халқаро кўпкари ва миллий халқ ўйинлари мусобақаси мазкур топшириққа биноан ўтказилган.
— Мусобақа доирасида миллий кураш, арқон тортиш, тош кўтариш, қўчқор, хўроз уриштириш каби миллий халқ ўйинлари ҳам ўтказилди, — дейди Бекзод Маматқулов. – Улоқ чопишда шаҳрисабзлик чавандоз тенгсиз деб топилган бўлса, кураш мусобақасида ғузорлик Шерали Жўраев мутлақ вазн тоифасида ғолиб чиқиб, бош соврин — Spark автомобилини қўлга киритди. Шунингдек, кураш бўйича аёллар ўртасида ҳам ғолиб ва совриндорлар аниқланди.
Маълум бўлишича, мусобақада гиламга чиқиб ғолибликни қўлга киритган полвонлар ҳам, улоқ айирган чавандозлар ҳам туя, той, қорамол, қимматбаҳо маиший техника буюмлари ва пул мукофотлари билан рағбатлантирилган.
Изоҳ (0)