Mo‘ynoq tumanida “NavrUZ” etnofestivalini o‘tkazish uchun tayyorgarlik ko‘rilmoqda. Bu haqda Qoraqalpog‘iston Respublikasi Madaniyat vaziri o‘rinbosari Asan Niyetullayev ma’lum qildi, deya xabar beradi O‘zA.
—Ushbu etnofestivalni tashkil qilishdan asosiy maqsad Mo‘ynoq tumanida turizmni rivojlantirishga hissa qo‘shish va milliy an’analarni madh etishdan iborat. Festival asosan tuman markazi — Hunarmandlar qishlog‘ida o‘tkaziladi. Tadbir ishtirokchilari ikki kun davomida folklor-etnografik jamoalarning chiqishlari, milliy o‘yinlar va ko‘rgazmalarni tomosha qilishi mumkin, — dedi Asan Niyetullayev.
Festival mehmonlari hududda baliqchilar, hunarmandlar uylari, milliy an’anaga mos tarzda uy mehmonxonalari qurilganiga guvoh bo‘ladi. Hunarmandlar shu yerda kashtachilik, gilamchilik, quroq tikish va boshqa ishlar bilan shug‘ullanmoqda.
Milliy an’analarga bag‘ishlangan teatrlashtirilgan xoreografik dasturlar namoyish etilishi ko‘zda tutilgan. Sumalak, Navro‘z go‘ja tayyorlanadi. Chimboy tumanidan kelgan uy ustalari esa o‘tovlarni qurish jarayonini ko‘rsatadi. Milliy hamda ot sporti o‘yinlari namoyish etiladi.
Festival davomida bir tomonda milliy kiyimlar modasi, ikkinchi tomonda hunarmandlarning qo‘l mehnatlari ko‘rgazmasi bo‘lib o‘tadi. Sayl tashkil etiladi, gulxan atrofida baxshilar terma-dostonlar ijro etadi.
Izoh (0)