“Toshshahartransxizmat” aksiyadorlik jamiyati hamda barcha avtobus saroylaridagi harakat xavfsizligi xodimlari tomonidan 2019-yilning yanvar va fevral oylarida yo‘l harakati xavfsizligini ta’minlash bo‘yicha salmoqli ijobiy ishlar amalga oshirildi. Bu haqda Toshkent shahar hokimligi Matbuot xizmati xabarida aytiladi.
2019-yil 7-yanvardagi tasdiqlangan ish rejasi asosida Jamiyat va avtokorxona harakat xavfsizligi xodimlari tomonidan haftaning seshanba, chorshanba va payshanba kunlari reyd tekshiruvlari tashkil etilmoqda. Unda aniqlangan kamchilik va qoidabuzarliklar bo‘yicha haydovchilarga nisbatan chora ko‘rib kelinmoqda.
Shuningdek, haftaning juma kunida Toshkent shahar IIBB YHXB Texnika nazorati bo‘limi xodimlari bilan birgalikda har bir avtobus saroyida haydovchi va chiptachilar bilan profilaktik o‘quv-mashg‘ulotlari tashkil etilib, yo‘l-transport hodisalarining oldini olish, yo‘l harakati xavfsizligini ta’minlash, yo‘l harakati qoidalariga hamda sohaga oid me’yoriy-hujjatlarga kiritilayotgan yangiliklar va o‘zgarishlar to‘g‘risida ma’lumotlar berilmoqda.
2019-yilning ikki oyi davomida “Toshshahartransxizmat” AJ tarkibidagi korxonalarda yo‘l harakati xavfsizligini ta’minlash borasida olib borilayotgan ishlar natijasida haydovchilar aybi bilan sodir etilgan YTHlar soni sezilarli darajada kamayishiga erishildi. Jumladan, 2019-yilning yanvar va fevral oylarida umuman yo‘l-transport hodisalari sodir etilmadi. 2018-yilning shu davrida esa haydovchilar aybi bilan 10 ta yo‘l transporti hodisasi sodir etilib, 1 kishi halok bo‘lgan, 9 kishi esa jarohat olgan edi.
Haydovchilar tomonidan 2019-yilning yanvar va fevral oylarida 20 marotaba yo‘l harakati qoidabuzarliklari sodir etilgan bo‘lib, 2018-yilga nisbatan 314 taga kamayishiga erishildi. Xususan, 2018-yilda esa bu ko‘rsatkich 334 taga yetgan edi.
Izoh (0)