Madaniyat vaziri Malayziya mamlakatiga qilgan xizmat safaridan so‘ng Singapur Respublikasiga tashrif buyurdi. Bu haqda O‘zbekiston Madaniyat vazirligining matbuot xizmati xabar bermoqda.
Madaniyat vaziri Baxtiyor Sayfullayev Singapur Respublikasi Madaniyat jamoatchiligi va yoshlar vaziri Greys Fu bilan uchrashdi. Greys Fu muloqot chog‘ida O‘zbekiston uning yuragidan alohida joy olgan mamlakatlardan biriligini e’tirof etdi. U doim O‘zbekistonga hurmat bilan qarashi va bunday jannatmakon yurtni hech bir davlatga o‘xshatib bo‘lmasligini ta’kidladi.
Uchrashuvda madaniy turizmni rivojlantirish, madaniy tadbirlarni tashkil etishda tajriba almashish, festivallarda ikki davlat fuqarolarining xususan, Singapur davlatida har yili fevral oyida o‘tkazib kelinayotgan “Chingay parad” festivalida O‘zbekiston vakillarining uzluksiz ishtirok etishi, O‘zbekiston tarixi va madaniyatiga oid ko‘rgazma tashkil etish, “Espalanda” va boshqa tajribali teatrlar o‘rtasida hamkorlikni yo‘lga qo‘yish va uni rivojlantirish hamda Singapur davlatida “O‘zbekiston madaniyati kunlari” madaniy dasturlarini muntazam o‘tkazish kabi masalalarning muhokamalari bo‘lib o‘tdi.
LASALLE san’at kolleji rahbari Stiv Dikson bilan madaniyat sohasidagi ta’lim muassasalari o‘rtasida hamkorlikni yo‘lga qo‘yish va tajribalar bilan o‘rtoqlashish bo‘yicha fikrlar almashildi.
Uchrashuvdan so‘ng, Madaniyat vaziri Baxtiyor Sayfullayev Singapurning diqqatga sazovor joylaridan bo‘lgan Islom muzeyiga tashrif buyurib, u yerdagi O‘zbekiston tarixiga oid manbalar bilan tanishdi.
Izoh (0)