AQSh hukumati rasmiy ravishda O‘zbekistonning Birinchi Prezidentining to‘ng‘ich qizi Gulnora Karimova va “Uzdunrobita” kompaniyasi sobiq direktori Behzod Ahmedovga qarshi ayblovlarni ilgari surdi, deb xabar berdi “Gazeta.uz”.
Gulnora Karimova va Behzod Ahmedov korrupsion tizimlarda ishtirok etganlik va 865 million dollardan ortiq pul yuvishda ayblanmoqda. Ushbu pullar uchta telekommunikatsion kompaniya — MTS, VimpelCom (hozir Veon, Beeline brendi) va TeliaSonera (hozirda Telia Company, Ucell savdo markasiga egalik qilgan) dan pora sifatida olingan.
AQSh adliya vazirligi ma’lumotlariga ko‘ra, MTS 2004—2012-yillarda 420 million dollar, VimpelCom (2006—2012) 114 million dollar, Telia (2007—2010) 331 million dollarni “O‘zbekistonda telekommunikatsion sanoatni nazorat qiluvchi boshqaruv organlariga ta’sir o‘tkazgan” Gulnora Karimovaga pora sifatida bergan.
Kompaniyalar Gulnora Karimovaga O‘zbekiston bozoriga kirish hamda operatorlarning keyingi operatsiyalarini amalga oshirishda uning yordamiga suyanish uchun pora bergan, deyiladi xabarda.
“Gulnora Karimova o‘zining rasmiy statusidan ta’magarlik uchun foydalanib, uchta ommabop telekommunikatsion kompaniyalardan 865 million dollardan ortiq miqdorda pora olganlik va ushbu porani AQSh moliya tizimi orqali yuvishda ayblanmoqda”, — deyiladi AQSh adliya vazirligi xabarida.
Karimova va Ahmedovga qarshi jinoyat ishi Nyu-York Janubiy okrugi sudiga oshirilgan.
Ayblanuvchilarning aybi sudda isbotlanmagunga qadar ularning ikkalasiga nisbatan aybsizlik prezumpsiyasi amal qiladi, deyiladi xabarda.
Izoh (0)