Prezident Administratsiyasi huzuridagi Axborot va ommaviy kommunikatsiyalar agentligida “Oila ensiklopediyasi” hamda “Xotin-qizlar ensiklopediyasi” kitoblarining taqdimoti bo‘lib o‘tdi. Bu haqda “Xalq so‘zi” xabar berdi.
Unda so‘z olgan ekspert Jamila Shermuhammedova taklif bilan chiqdi.
“Oilaviy ajrimlar haqida gapirganda, respublikamizdagi ko‘rsatkichlarni Yevropa davlatlaridagi bilan taqqoslash, o‘zimizni ovutish, maqtash, ayblarimizni xaspo‘shlash to‘g‘ri emas . Muammolarning ichiga kirib borishimiz kerak. Ajrimlarning sabablarini aniqlashimiz, shu bo‘yicha choralar ko‘rishimiz lozim. Bizda oila milliy qadriyatlar va sharqona madaniyat poydevoriga quriladi. Aynan mazkur aqidalar bilan sug‘orilgan kitoblarni ko‘paytirishimiz kerak.
Mening takliflarim bor: kelinglar, ‘Erkaklar ensiklopediyasi‘ni yarataylik. Oilada erkakning, otaning o‘rnini ko‘tarmas ekanmiz, u haqda kitoblar yozib, maqomini ulug‘lamas ekanmiz, oila mexanizmidagi ayrim elementlar yaxshi ishlamaydi, ajrimlar soni ortaveradi. Yoshlarga bolaligidan oilada o‘g‘illik burchi, otalik vazifalari, erlik mas’uliyati haqida bilim berish zarur. Bu hayot-mamot masalasi. Men hatto O‘zbekiston Erkaklar qo‘mitasini tuzish taklifi ham jiddiy o‘ylab ko‘rishga arziydi deb hisoblayman”, dedi Jamila Shermuhammedova.
Izoh (0)