2018—2019-o‘quv yilining birinchi yarim yilligi yakuni bo‘yicha Mudofaa vazirligi tizimidagi barcha oliy harbiy ta’lim muassasalarida amalga oshirilgan ishlar yuzasidan hisobot yig‘ilishi o‘tkazildi. Bu haqda vazirlik matbuot xizmati “Daryo”ga ma’lum qildi.
Mazkur tadbir mudofaa vazirining o‘rinbosari general-mayor Azizbek Ikromov boshchiligida olib borildi. Yig‘ilishda Mudofaa vazirligi Kadrlar bosh boshqarmasi ofitserlari, barcha oliy harbiy ta’lim muassasalarining boshliqlari, ularning o‘quv va ilmiy ishlar bo‘yicha o‘rinbosarlari, kafedra va sikl boshliqlari, professor-o‘qituvchilar qatnashdi.
Tadbir davomida harbiy ta’lim muassasalarida ta’lim-tarbiyaning 2018—2019-o‘quv yili birinchi yarim yilligi davridagi tahlili, o‘quv jarayonidagi tizimli muammolar va ularni bartaraf etish yo‘llari muhokama qilindi.
Jumladan, yig‘ilish davomida harbiy xizmatchilarni o‘qitish, ularga ta’lim berish, professional jihatdan qayta tayyorlash va malakasini oshirish, pedagogik va ilmiy salohiyatini yanada yuksaltirish, shuningdek, joylarda ta’lim sifatini yaxshilashga to‘sqinlik qilayotgan bir qator institutsional va tashkiliy muammolar mavjudligi ta’kidlandi.
Shu bilan birga ma’ruzachilar tomonidan ta’lim-tarbiya jarayonini takomillashtirish, tayyorlanayotgan harbiy kadrlarni har tomonlama yetuk, yuqori bilim va ko‘nikmalarga ega bo‘lgan, dunyoqarashi va fikrlash doirasi keng mutaxassislarni hamda yuqori professional o‘qituvchilarni tayyorlash bo‘yicha bir qancha taklif va tavsiyalar taqdim qilindi.
Tadbir yakunida Kadrlar bosh boshqarmasi boshlig‘i polkovnik Farhod Shermatov tomonidan ushbu tadbirni har 6 oyda o‘tkazish taklifi ilgari surildi va ushbu taklif anjuman qatnashchilari tomonidan bir ovozdan qo‘llab-quvvatlandi.
Izoh (0)