1 мартнинг эътиборга молик янгиликлари — «Дарё» дайжестида.
Олий Мажлис Сенатининг ўн саккизинчи ялпи мажлиси ўз ишини якунлади.
Мажлис кун тартибига киритилган 23 та масаланинг 15 таси кеча кўриб чиқилган эди. Бугун сенаторлар, вазирлик ва идоралар раҳбарлари қолган 8 та масалани муҳокама қилиш баробарида Инсон ҳуқуқлари бўйича вакили (омбудсман) Улуғбек Муҳаммадиевнинг тузилма 2018 йилдаги фаолиятига оид ҳисоботи, Адлия вазири Русланбек Давлетовнинг ахбороти, Қашқадарё вилояти ҳокими Зафар Рўзиевнинг ҳисоботи тингланди. Ўзбекистон Республикаси Бош вазири, Бош вазир ўринбосарларига парламент сўровлари юборилди.
***
Президентнинг Наманган вилоятига ташрифи бугун, 1 март куни ҳам давом этди.
Наманган шаҳар ҳокимлигида Президент Шавкат Мирзиёев раислигида вилоят фаолларининг видеоселектор йиғилиши бўлиб ўтди. Унда давлат раҳбари Тошкентда келгусида Президент университети очилишини маълум қилди.
Шунингдек, Шавкат Мирзиёев Намангандаги етакчи диагностика маркази фаолияти билан танишди.
***
Тошкент вилоятида яшовчи эркак собиқ хотинини ўлдириш учун 1500 долларга «киллер» ёллади.
2019 йил 11 февраль куни Тошкент вилояти ИИБга Чирчиқ шаҳрида яшовчи 1970 йилда туғилган фуқаро Б. Й ариза билан мурожаат қилиб, таниши Қибрай туманида яшовчи 1981 йилда туғилган Д. А собиқ турмуш ўртоғи 1979 йилда туғилган Ш. Мни ўлдириши ҳақида топшириқ бериб, эвазига унга 1 500 АҚШ доллари миқдоридаги пулларни ваъда қилаётганлигини маълум қилади.
***
Пахтачи туманидаги мактабда ЁЧТ фани ўқитувчиси ўқувчини урди. Ўқувчининг талоғи ёрилган.
Маълумотларга кўра, Ж.Х. мактабга форма билан келмагани учун мактабнинг ёшлар етакчиси А.Ғ. ўқувчининг бошига линейка (жадвал таёқ) билан урган. Воқеа айнан шундан бошланган. Шундан сўнг мактаб ўқитувчиси Д.Б. ҳам уни урган. Бироқ Д.Б. нима сабабдан Ж.Х.ни урганлиги ҳозирча номаълум.
***
Тошкент халқаро аэропортида Дубайдан учиб келган қиз қўлга олинди.
Чегара назоратидан ўтиш чоғида Самарқанд вилояти Нарпай туманида яшовчи фуқаро М.М., 7 ноябрь 2016 йилда паспортида хорижга чиқиш стикери бўлмаган ҳолда Тошкентдан Қирғизистонга, у ердан эса Уммон давлатига учиб, Уммондан Дубайга учиб борганлиги аниқланган.
Изоҳ (0)