Fransiyaning “Marsel” klubi safida harakat qilayotgan angliyalik hujumchi Meyson Grinvud faoliyatini Saudiya Arabistoni chempionatida davom ettirishi mumkin. Fichajes nashrining xabar berishicha, “Al-Ahli”, “Al-Hilol” va “Neom” klublari 23 yoshli futbolchi uchun 80 million yevrolik taklif tayyorlamoqda.
Ma’lumotlarga ko‘ra, Grinvudning sobiq klubi — “Manchester Yunayted” futbolchining keyingi transferidan 50 foizlik bonusga ega bo‘ladi. Ya’ni, agar Grinvud Saudiya klublaridan biriga sotilsa, “qizil iblislar” taxminan 40 million yevro ishlab oladi.
Shuningdek, “Marsel” ham futbolchining navbatdagi transferidan 20 foizlik ulushni o‘zida saqlab qolmoqchi. Bu, zamonaviy transfer siyosatida keng qo‘llanilayotgan usullardan biri bo‘lib, klub futbolchi bilan xayrlashganidan so‘ng ham undan foyda olishda davom etishini anglatadi.
Yaqin kunlarda Meyson Grinvud o‘z kelajagi borasida qaror qabul qilishi kutilmoqda. Uning oldida ikki yo‘l turibdi: katta maosh evaziga Saudiya Arabistoniga ko‘chib o‘tish yoki Yevropada qolib, top-darajadagi futbolchi sifatida o‘zini namoyon etish.
Ma’lumot uchun, Grinvud o‘tgan mavsum “Marsel” safida jami 36 ta o‘yinda maydonga tushib, o‘z hisobiga 22 ta gol va 6 ta golli uzatma yozdirib qo‘ygan. Transfermarkt portali uning qiymatini 40 million yevroga baholamoqda.
Izoh (0)