26-fevralning e’tiborga molik xabarlari — “Daryo” dayjestida.
Joriy yilning 26-fevral kuni taxminan 10:30 da Andijon shahar tibbiyot birlashmasiga qarashli markaziy poliklinikasining isitish qozonxonasida qozon portladi.
O‘zbekiston Favqulodda vaziyatlar vazirligi xabar berishicha, birlamchi ma’lumotlarga ko‘ra, mazkur holatning kelib chiqishiga, isitish qozonining nosozligi sabab bo‘lgan.
Avariya natijasida, voqea joyidan uzoq bo‘lmagan, flyuorografiya xonasida navbatdagi tibbiy ko‘rikdan o‘tayotgan Andijon shahar 4-sonli umumta’lim maktabining o‘quvchilari jabrlangan.
Andijondagi poliklinikada yuz bergan portlash jabrlanuvchilari hodisa haqida so‘zlab berdi.
***
Jizzaxda maktab o‘quvchisining o‘limiga nima sabab bo‘lgani ma’lum qilindi.
23-fevral kuni Jizzax viloyati Zafarobod tumanida 10-maktabning 6-sinf o‘quvchisi B.B. vafot etgan.
Unda yuragi bilan bog‘liq muammo bo‘lgan, futbol o‘ynayotgan vaqtida yuragi to‘xtab qolishi oqibatida vafot etgan.
***
O‘zbekistonda ota-onalar kunini nishonlash taklif etildi.
“Mening fikrim” jamoaviy murojaatlar portalida ota-onalar kunini tashkil etish haqida petitsiya paydo bo‘ldi.
BMTda ota-onalar kuni 1-iyunda, AQShda iyulning oxirgi yakshanbasida, Koreyada 8-may kuni, Vyetnamda esa 7-iyul kuni nishonlanadi.
***
O‘zbekistonda yanvar oyida oltin-valyuta zaxiralari 206 mln dollarga ko‘paydi.
O‘zbekistonning sof oltin-valyuta zaxiralari hajmi 1-fevral holatiga 26,6 milliard dollarni tashkil etdi. Yanvar oyida 206 million dollar o‘sish qayd etilgan.
Shuningdek, yaqin besh yilda oltin zaxiralarining o‘sishi 474 tonnani (18,75 milliard dollarga teng) tashkil etishi mumkin. Jamoatchilik muhokamasi uchun e’lon qilingan geologiya sohasini rivojlantirish konsepsiyasi loyihasida shu haqda so‘z boradi.
***
“O‘zbekkonsert” davlat muassasasi tomonidan 26-fevraldan e’tiboran “Bravo” jamoasi va aktrisa Halima Ibragimovaning litsenziyasi tugatildi.
Ular ““O‘zbekkonsert” bilan tuzgan litsenziya talablari va shartlari qo‘pol ravishda buzilgani, ya’ni o‘tkazilgan konsert dasturlarida muassasaga topshirilgan ssenariydan chetga chiqib, milliy urf-odatlar, odob-axloq, ma’naviy qadriyatlarga yot bo‘lgan, fahshni targ‘ib qiluvchi hajviyalar orqali o‘zbek so‘z san’ati obro‘siga putur yetkazayotgani, ijtimoiy tarmoqlarda san’atkor odobiga rioya etmagani uchun” litsenziyadan mahrum etilgan.
Izoh (0)