Андижондаги портлаш, жиззахлик ўқувчи ўлимининг сабаби, Ўзбекистонда нишонлаш таклиф этилаётган Ота-оналар куни ва куннинг бошқа хабарлари

26 февралнинг эътиборга молик хабарлари — «Дарё» дайжестида.

Жорий йилнинг 26 февраль куни тахминан 10:30 да Андижон шаҳар тиббиёт бирлашмасига қарашли марказий поликлиникасининг иситиш қозонхонасида қозон портлади.

Ўзбекистон Фавқулодда вазиятлар вазирлиги хабар беришича, бирламчи маълумотларга кўра, мазкур ҳолатнинг келиб чиқишига, иситиш қозонининг носозлиги сабаб бўлган.

Авария натижасида, воқеа жойидан узоқ бўлмаган, флюорография хонасида навбатдаги тиббий кўрикдан ўтаётган Андижон шаҳар 4-сонли умумтаълим мактабининг ўқувчилари жабрланган.

Андижондаги поликлиникада юз берган портлаш жабрланувчилари ҳодиса ҳақида сўзлаб берди.

***

Жиззахда мактаб ўқувчисининг ўлимига нима сабаб бўлгани маълум қилинди.

23 февраль куни Жиззах вилояти Зафаробод туманида 10-мактабнинг 6-синф ўқувчиси Б.Б. вафот этган.

Унда юраги билан боғлиқ муаммо бўлган, футбол ўйнаётган вақтида юраги тўхтаб қолиши оқибатида вафот этган.

***

Ўзбекистонда ота-оналар кунини нишонлаш таклиф этилди.

«Менинг фикрим» жамоавий мурожаатлар порталида ота-оналар кунини ташкил этиш ҳақида петиция пайдо бўлди.

БМТда ота-оналар куни 1 июнда, АҚШда июлнинг охирги якшанбасида, Кореяда 8 май куни, Вьетнамда эса 7 июль куни нишонланади.

***

Ўзбекистонда январь ойида олтин-валюта захиралари 206 млн долларга кўпайди.

Ўзбекистоннинг соф олтин-валюта захиралари ҳажми 1 февраль ҳолатига 26,6 миллиард долларни ташкил этди. Январь ойида 206 миллион доллар ўсиш қайд этилган.

Шунингдек, яқин беш йилда олтин захираларининг ўсиши 474 тоннани (18,75 миллиард долларга тенг) ташкил этиши мумкин. Жамоатчилик муҳокамаси учун эълон қилинган геология соҳасини ривожлантириш концепцияси лойиҳасида шу ҳақда сўз боради.

***

«Ўзбекконцерт» давлат муассасаси томонидан 26 февралдан эътиборан «Bravo» жамоаси ва актриса Ҳалима Ибрагимованинг лицензияси тугатилди.

Улар ««Ўзбекконцерт» билан тузган лицензия талаблари ва шартлари қўпол равишда бузилгани, яъни ўтказилган концерт дастурларида муассасага топширилган сценарийдан четга чиқиб, миллий урф-одатлар, одоб-ахлоқ, маънавий қадриятларга ёт бўлган, фаҳшни тарғиб қилувчи ҳажвиялар орқали ўзбек сўз санъати обрўсига путур етказаётгани, ижтимоий тармоқларда санъаткор одобига риоя этмагани учун» лицензиядан маҳрум этилган.