“Ma’rifat” gazetasining 16-fevral sonida “Zominlik o‘qituvchilar maoshi nega kechikyapti?” nomli maqola chop etilgan. Ushbu maqola yuzasidan O‘zbekiston Xalq ta’limi vazirligi bayonot berdi.
Xabar berishlaricha, o‘qituvchilarga naqd pul berish Xalq ta’limi vazirligi va hududiy boshqarmalari vakolatiga kirmasa-da, vazirlik vakolati doirasida gazetada chop etilgan Zomin tumanidagi o‘qituvchilar murojaatlarini o‘rganib chiqqan.
Ayni vaqtda naqd pul yetkazib berish uchun mahalliy banklar mas’ul ekanligi ta’kidlangan. “Shu o‘rinda mahalliy banklar naqd pul yetkazib berish uchun mas’ul ekanligini ta’kidlashimiz lozim”, — deyiladi vazirlik bayonotida.
Murojaat yuzasidan Jizzax viloyati hokimiyati vakillari bergan ma’lumotga ko‘ra, bu kabi holatlarni yuzaga kelishiga mahalliy banklardagi naqd pul taqchilligi muammosi sabab bo‘lgan.
“Ammo bugungi kunda bu masala ijobiy hal etilgan. Ayni vaqtda barcha o‘qituvchilar oylik maoshlarini naqd pul bilan olgan”, — deyiladi vazirlik bayonotida.
Izoh (0)