Зоминлик ўқитувчилар маоши кечикаётганидан шикоят қилди. Халқ таълими вазирлиги бунга муносабат билдирди

«Маърифат» газетасининг 16 февраль сонида «Зоминлик ўқитувчилар маоши нега кечикяпти?» номли мақола чоп этилган. Ушбу мақола юзасидан Ўзбекистон Халқ таълими вазирлиги баёнот берди.

Хабар беришларича, ўқитувчиларга нақд пул бериш Халқ таълими вазирлиги ва ҳудудий бошқармалари ваколатига кирмаса-да, вазирлик ваколати доирасида газетада чоп этилган Зомин туманидаги ўқитувчилар мурожаатларини ўрганиб чиққан.

Айни вақтда нақд пул етказиб бериш учун маҳаллий банклар масъул эканлиги таъкидланган. «Шу ўринда маҳаллий банклар нақд пул етказиб бериш учун масъул эканлигини таъкидлашимиз лозим», — дейилади вазирлик баёнотида.

Мурожаат юзасидан Жиззах вилояти ҳокимияти вакиллари берган маълумотга кўра, бу каби ҳолатларни юзага келишига маҳаллий банклардаги нақд пул тақчиллиги муаммоси сабаб бўлган.

«Аммо бугунги кунда бу масала ижобий ҳал этилган. Айни вақтда барча ўқитувчилар ойлик маошларини нақд пул билан олган», — дейилади вазирлик баёнотида.