Тошкент туманидаги 26-умумий ўрта таълим мактабида Заҳириддин Муҳаммад Бобурнинг ўн учинчи авлоди — Зайниддин Мавлонов билан учрашув бўлиб ўтди. Бу ҳақда ЎзА хабарида айтилади.
— 1956 йилда биринчи синфга боришим арафасида ота-онам: «Мактабда дадажонинг тўғрисида сўрасалар, оддий ишчи дегин, келиб чиқишимиз ва боболаринг ҳақида гапирмагин», — деб тайинлаган эдилар. У вақтларда ёш эдим. Шажара тўғрисида маълумотга эга эмасдим. Иккинчи синфда ўқиётганимда синф деворига осилган Бобур Мирзо портретига кўзим тушди. Бу менинг бобожоним деб қичқирдим, қувонганимдан. Ахир шунга ўхшаган портрет уйда ҳам бор эди-да.
Менинг отам Носириддин Мирзо бўлиб, 1896 йилда Бухорода таваллуд топган. Уларнинг отаси Мирзомуйиддин (Шаҳзода Мирхазар) 1852 йилда Деҳлида туғилган. 1857 йилда Ҳиндистон Англия колониясига айлангач, охирги бобурий тождор Абдузафар Сирожиддин Муҳаммад Баҳодиршоҳ қамалда қолади. Шаҳзода Мирхазар саройдагиларнинг бир қисми билан қочади.
Бироқ, жуда кўпчилик жазоланади. Олти яшар шаҳзода Мирзо Муйиддиннинг тарафдорлари яширинча Ҳиндистоннинг шимолидаги бобурий подшоҳлар манзили бўлган Кашмирга олиб келади. 1880 йилда уни инглиз разведкаси топади. Улар етиб келгунча, шаҳзодани Кашмир — Кобул — Мозори Шариф — Термиз орқали Мовароуннаҳрга олиб кетишади. Шу тариқа Бухорога келиб қолган шаҳзода Амир Сайид Олимхон хизматида бўлган, — дея ўтмиш ҳақидаги хотиралари билан бўлишди Зайниддин Мавлонов.
Изоҳ (0)