Viloyat hokimi Erkinjon Turdimov tomonidan tasdiqlangan chora-tadbirlar rejasiga ko‘ra Samarqand shahridagi mahalla fuqarolar yig‘inlari faoliyati tanqidiy o‘rganildi. Bu haqda “Zarnews” xabar berdi.
Shahardagi 18 ta mahallada fuqarolar yig‘inlari o‘z binosiga ega bo‘lmagani bois ularda faoliyat yuritish uchun sharoit yo‘q. 16 ta mahalla binosi ta’mirtalab.
30 dan ziyod mahallada mebel jihozlari yetishmaydi, kompyuter jamlanmalari eskirgan yoki yaroqsiz holga kelib qolgan. Zarur shart-sharoit yaratilmagani sababli mahallalarda muammolar yildan-yilga ortib bormoqda.
Nazorat kamligi, aholi o‘rtasida umumprofilaktik tadbirlar o‘tkazilmayotganligi sabab hududlarda jinoyatchilik va huquqbuzarliklar ko‘paygan. Xususan, 36 (17,3 foiz) mahallada jinoyatlar 2017-yilga nisbatan oshgan. Hatto mahalla raislarining o‘zi jinoyatga qo‘l urmoqda. Masalan, Ali Qushchi mahallasining sobiq raisi o‘z mansab vakolatini suiiste’mol qilib, Beruniy ko‘chasida yashagan marhum A.Petrovga tegishli xonadonni nomiga rasmiylashtirib olgan.
Shuningdek, MFY xodimlari, ayniqsa, mas’ul kotib va mahalla posbonlari orasida qo‘nimsizlik, bir yil ham ishlamasdan vazifasidan ketish holatlari ko‘p uchrayapti. Ayni paytda shaharda 11 ta mahalla raisi, 3 ta mas’ul kotib, 27 ta mahalla posboni vazifasi vakant bo‘lib turibdi.
Izoh (0)