AQShning Janubiy Kaliforniya universiteti olimlari okean tubidan “biosfera bombasi”ni topdi. U kelajakda Yerda halokatli o‘zgarishlarga sabab bo‘ladi. Bu haqda “Korrespondent.net” xabar berdi.
Yer biosferasida halokatli o‘zgarish bo‘lishi uchun Tinch okeani suvi haroratini ikki darajaga ko‘tarishning o‘zi yetarli. Olimlar okean tubida to‘planib qolgan gazni aniqladi. Bu gaz keyinchalik suv yuzasiga chiqib, Yer atmosferasining to‘satdan ilishiga olib kelishi mumkin.
Xabarda aytilishicha, gaz geotermal manbalardan ajralib chiqadi va okean tubida yig‘ilib qoladi. Hozir bu gaz rezervuarlari barqaror. Lekin suvning ilishi ularni muvozanatdan chiqarib yuboradi. Okean yerdan haddan tashqari issiqlikni olmoqda, suvga tushayotgan issiqxona gazlari esa doimiy ravishda oshib bormoqda. 2100-yillarga borib, okean uch darajaga qiziydi.
Olimlarning fikricha, gazning okean tubidan chiqishi muqarrar. Ammo bu qachon yuz berishi noma’lum. Lekin olimlar bunday hodisa ikki marta bo‘lganini aytmoqda. Birinchi marta 55 million yil avval sodir bo‘lganida paleotsen-eotsen terminal o‘zgarishga olib kelgan. Keyin Yer sakkiz darajaga isigan. 17 ming yil avval esa bu jarayon atmosferani isitgan va muzlik davriga nuqta qo‘ygan.
Izoh (0)