MDH davlatlari hukumat rahbarlari kengashi huzuridagi jangchi-baynalmilalchilar ishlari bo‘yicha qo‘mita raisi Aleksandr Kovalyov Toshkentda “Turkiston” saroyida o‘tkazilgan tadbirda o‘zbekistonlik bir qator baynalmilalchi jangchi-veteranlarni qimmatbaho toshli ordenlar bilan mukofotladi. Bu haqda Sputnik xabar berdi.
Xususan, O‘zbekiston VETERAN jangchi-faxriy va nogironlari birlashmasi rahbari Tal’at Muradov brilliant toshli orden bilan mukofotlandi.
Mudofaa vaziri o‘rinbosari, Qurolli kuchlari akademiyasi rahbari general-mayor Aziz Ikramov yoqut toshli “Vatanga xizmat” ordeni bilan taqdirlandi.
Prezident Administratsiyasi xodimi Shavkat Ahmedov brilliant toshli “Vatanga xizmat” ordeni bilan mukofotlandi.
Shuningdek, O‘zbekiston viloyatlari hokimlari ham ordenlar bilan mukofotlandi. Sirdaryo viloyati hokimi G‘ofirjon Mirzayev va Farg‘ona viloyati hokimi Shuhrat G‘aniyev “Vatanga xizmat” ordeni bilan taqdirlandi.
Qimmatbaho toshli ordenlarni o‘z egalariga topshirgan Kovalyov Afg‘onistondan sovet qo‘shinlari chiqarilganining 30 yilligi munosabati bilan Moskvada o‘tkaziladigan tantanali tadbirga o‘zbekistonliklarni taklif etdi.
Izoh (0)