O‘tgan yili O‘zbekistonda yo‘l-transport hodisalari oqibatida halok bo‘lganlar soni 2262 kishini tashkil qilgan, deya xabar beradi “Gazeta.uz”.
2017-yil bilan taqqoslaganda ushbu ko‘rsatkich 8,5 foizga kamaygan, ammo raqam yuqoriligicha qolmoqda — kuniga 6,2 kishi.
Yo‘l halokatlarida jabrlanganlar soni 8458 kishini tashkil qilib 12,2 foizga tushgan.
Qayd etish joizki, Butunjahon sog‘liqni saqlash tashkiloti o‘zining hisobotlarida boshqacha ma’lumotlarni keltiradi.
Masalan, agar 2016-yilda O‘zbekiston 2496 nafar qurbon haqida xabar bergan bo‘lsa, BST ushbu raqamni 3617 kishi deb ko‘rsatgan. BST raqamlardagi tafovutni turli mamlakatlardagi turli hisob-kitob metodologiyasi bilan izohlaydi.
Xalqaro tashkilot O‘zbekistonda aholi yashash punktlarida ruxsat etilgan maksimal tezlik (70 km/s), xavfsizlik kamarlari va bolalar o‘rindiqlarining o‘rnatilishida talablarning yetarli emasligini qayd etgan.
Izoh (0)